December 27, 2013

സന്തോഷ് ട്രോഫി കേരള ഫുട്‌ബോളിന്റെ ലോകകപ്പ്: ഇഗ്നേഷ്യസ്

തിരുവനന്തപുരം: 2004 ഒക്ടോബര്‍ 31 ഇഗ്നേഷ്യസ് സില്‍വസ്റ്ററിന് മറക്കാനാവില്ല, കേരളത്തിനും. അന്നാണ് കേരളം അവസാനമായി സന്തോഷ് ട്രോഫി ഫുട്‌ബോള്‍ കിരീടത്തില്‍ മുത്തമിട്ടത്. ക്യാപ്റ്റന്‍ ഇഗ്നേഷ്യസിന്റെ ഗോള്‍ഡന്‍ ഗോളിലായിരുന്നു കേരളത്തിന്റെ വിജയം. ജോലിത്തിരക്കിനിടയിലും  ഡല്‍ഹി അംബേദ്കര്‍ സ്റ്റേഡിയത്തിലെ ആ സായാഹ്നം  ഡ്രിബിള്‍ ചെയ്ത് ഇഗ്നേഷ്യസിന്റെ മനസ്സിലേക്ക് ഇപ്പോഴും ഇടയ്ക്കിടെ ഓടിയെത്തുന്നു.

2004ലെ ഫൈനലില്‍ ശക്തരായ പഞ്ചാബായിരുന്നു എതിരാളികള്‍. രണ്ടാം പകുതിയില്‍ കേരളം 1-2ന് പിന്നിട്ടുനില്‍ക്കുന്നു. നൗഷാദിന്റെ ഗോളിലൂടെ കേരളം ഒപ്പമെത്തി. കളിതീരാന്‍ നിമിഷങ്ങള്‍ മാത്രമുളളപ്പോള്‍ പെനാല്‍റ്റി കിട്ടിയതോടെ  കപ്പുറപ്പിച്ചു. പക്ഷേ, ലയണല്‍ തോമസിന്റെ സ്‌പോട്ട് കിക്ക് ലക്ഷ്യത്തിലെത്തിയില്ല. കളി അധികസമയത്തിലേക്ക് നീങ്ങി. എക്‌സ്ട്രാ ടൈമിന്റെ പതിനേഴാം മിനിറ്റിലായിരുന്നു ഇഗ്നേഷ്യസിന്റെ ഇടങ്കാലന്‍ വെടിയുണ്ട പഞ്ചാബിന്റെ നെഞ്ചുതകര്‍ത്തത്. നൗഷാദ് പാരി നല്‍കിയ പാസ് സമയംപാഴാക്കാതെ ഇഗ്നി പോസ്റ്റിലേക്ക് പറത്തിയപ്പോള്‍ പഞ്ചാബ് ഗോള്‍കീപ്പര്‍ കാമേശ്വര്‍ സിംഗിന് മറുപടി ഉണ്ടായിരുന്നില്ല. കേരളം അഞ്ചാം തവണയും സന്തോഷ് ട്രോഫി ജേതാക്കള്‍. ഈവര്‍ഷം കേരളപ്പിറവി ആഘോഷിക്കുന്ന മലയാളികള്‍ക്കുള്ള സമ്മാനംകൂടിയായിരുന്നു ഇഗ്നേഷ്യസും സംഘവും നേടിയ വിജയം.

പത്തുവര്‍ഷത്തിന് ശേഷം സന്തോഷ് ട്രോഫി വീണ്ടെടുക്കാനായി കേരളം വീണ്ടും കച്ചമുറുക്കുമ്പോള്‍ ഇഗ്നേഷ്യസിന്റെ പ്രതീക്ഷയും വാനോളമുയരുകയാണ്. കേരളം ഓരോതവണ  സന്തോഷ് ട്രോഫിയില്‍ കളിക്കുമ്പോഴും ചാമ്പ്യന്‍മാരാവണമെന്നാണ് ആഗ്രഹം. കാരണം കേരള ഫുട്‌ബോളിന്റെ ലോകകപ്പാണ് സന്തോഷ് ട്രോഫി. സന്തോഷ് ട്രോഫിയില്‍ മികച്ച പ്രകടനം നടത്തിയാലെ കേരളത്തിലെ ഫുട്‌ബോളിന് നിലനില്‍പുള്ളൂ. മാധ്യമശ്രദ്ധ ലഭിക്കാനും പുതുതലമുറയെ കളിയിലേക്ക് ആകര്‍ഷിക്കാനും സന്തോഷ് ട്രോഫി വഹിക്കുന്ന പങ്ക് പറഞ്ഞറിയിക്കാനാവില്ല- ഇഗ്നേഷ്യസ് പറഞ്ഞു.

യുവതാരങ്ങളും പരിചയസമ്പന്നരുമടങ്ങിയ സംഘമാണ് ഇത്തവണത്തേത്. നന്നായി വിയര്‍പ്പൊഴുക്കിയാല്‍  കീരീടം വീണ്ടെടുക്കാം. ദക്ഷിണമേഖലയില്‍ നിന്ന് രണ്ടു ടീമുകളാണ് ഫൈനല്‍ റൗണ്ടിലേക്ക് യോഗ്യതനേടുക. ആതിഥേയരെന്ന മുന്‍തൂക്കം തമിഴ്‌നാടിനുണ്ടാവും. റെയില്‍വേയെയും കര്‍ണാടകയെയും നിസാരമായി കാണാനാവില്ല. നല്ല കളിക്കാരുളള ടീമുകളാണ് അവര്‍. എതിരാളികള്‍ നിസാരക്കാരല്ലെന്ന് മനസ്സിലാക്കിയാവണം ഓരോ കളിക്കും ഇറങ്ങേണ്ടത്. ചെറിയ പിഴവുപോലും തിരുത്താന്‍ അവസരം ലഭിച്ചേക്കില്ല.

എ എം ശ്രീധരന്‍ സാറിനെപ്പോലുളള പരിചയ സമ്പന്നനായ കോച്ചിന്റെ സേവനം ടീമിന് ഗുണം ചെയ്യും. കേരളം ജയിക്കണമെന്ന വാശിയില്‍ കളിച്ചാലെ കിരീടത്തിലെത്താനാവൂ. പുതുതലമുറയിലെ ചിലരെങ്കിലും സ്വന്തം ശരീരവും ഭാവിയുമൊക്കെ നോക്കി പരുക്കുപറ്റാതെ കളിക്കാനാണ് ശ്രമിക്കുന്നത്. ഞങ്ങളൊക്കെ പരുക്കും മറ്റ് കാര്യങ്ങളും വകവയ്ക്കാതെയാണ് നാടിന് വേണ്ടി കളിച്ചത്. അത് ഞങ്ങളുടെ മുന്‍ഗാമികള്‍ കാണിച്ചുതന്നതാണ്. അങ്ങനെ കളിച്ചാലെ കിരീടത്തിലെത്താനാവൂ- ഇഗ്നേഷ്യസ് പറഞ്ഞു.

എസ് ബി ടിയുടെ താരമായിരുന്ന ഇഗ്നേഷ്യസ് 1999 മുതല്‍ 2004 വരെ കേരളത്തിന്റെ കുപ്പായമണിഞ്ഞു. 2004ലെ ഗോള്‍ഡന്‍ ഗോളിലൂടെ അനശ്വരനായ ഇഗ്നേഷ്യസ്  രണ്ടായിരത്തില്‍ തൃശൂരില്‍ നടന്ന സന്തോഷ് ട്രോഫിയില്‍ ആറു ഗോളുകളോടെ ടോപ് സ്‌കോററുമായി. 1995 മുതല്‍ 2007വരെ എസ് ബി ടിക്ക് വേണ്ടി ബൂട്ടണിഞ്ഞു. ബാങ്കിന് വേണ്ടി നൂറിലധികം ഗോളുകള്‍ നേടിയിട്ടുണ്ട്.

തിരുവനന്തപുരം വെട്ടുകാടു സ്വദേശിയായ ഇഗ്നേഷ്യസ് ഇപ്പോള്‍ എസ് ബി ടി മണക്കാട് ബ്രാഞ്ചില്‍ സിംഗിള്‍ വിന്‍ഡോ ഓപ്പറേറ്ററായി ജോലിചെയ്യുകയാണ്. ഡല്‍ഹിയില്‍ നഴ്‌സായ പ്രിറ്റിയാണ് ഭാര്യ. മകള്‍ മൂന്നു വയസ്സുകാരി അലോന മരിയ ഇഗ്നേഷ്യസ്.

May 29, 2013

ധോണിയുടെ മൗനത്തിന് പിന്നില്‍

ഇന്ത്യന്‍ പ്രിമിയര്‍ ലീഗ് ഒത്തുകളി വിവാദത്തില്‍ കൊടുമ്പിരിക്കൊണ്ടിരിക്കുകയാണ് ക്രിക്കറ്റ് ലോകം. ഒത്തുകളിക്ക് പിടിയിലായ എസ് ശ്രീശാന്തും അങ്കീത് ചവാനും അജിത് ചാന്ദിലയുമൊക്കെ വാര്‍ത്തയുടെ പിന്നാമ്പുറത്തായിക്കഴിഞ്ഞു. ബി സി സി ഐ പ്രസിഡന്റ് എന്‍ ശ്രീനിവാസനും മരുമകന്‍ ഗുരുനാഥ് മെയ്യപ്പനും ഇന്ത്യന്‍ നായകന്‍ എം എസ് ധോണിയുമൊക്കെയാണ് ഇപ്പോഴത്തെ താരങ്ങള്‍. പ്രസിഡന്റ് സ്ഥാനം രാജിവയ്ക്കില്ലെന്ന ശ്രീനിവാസന്റെ തീരുമാനവും ഇതിനായുളള വാദങ്ങളും വാര്‍ത്താലോകത്ത് പറപറക്കുകയാണ്. എന്നാല്‍, ഇതിനിടയില്‍ എം എസ് ധോണിയുടെ മൗനമാണ് ഏറ്റവും ശ്രദ്ധേയം.

ഇന്ത്യന്‍ ക്രിക്കറ്റിനെ പിടിച്ചുലച്ച സംഭവമായിട്ടും ഇക്കാര്യത്തില്‍ ധോണി പ്രതികരിക്കുന്നില്ലെന്നതാണ് കാര്യങ്ങള്‍ പുതിയ തലത്തിലെത്തിക്കുന്നത്. മാധ്യമപ്രവര്‍ത്തകര്‍ പതിനെട്ടടവും പയറ്റിയിട്ടും ധോണി മൗനം പാലിച്ചു. ധോണി എന്തൊക്കെയോ മറയ്ക്കുന്നു എന്നുതന്നെയാണ് ഈ മൗനം വ്യക്തമാക്കുന്നത്. അല്ലെങ്കില്‍ ആരെയൊക്കെയോ മനപൂര്‍വം സംരക്ഷിക്കുന്നു.

എല്ലാകാര്യത്തിലും വ്യക്തമായ അഭിപ്രായം ഉളള വ്യക്തിയാണ് ധോണി. ഇത് എപ്പോഴും തുറന്ന് പറയാറുമുണ്ട്. ഇങ്ങനെയൊരു വ്യക്തിയാണ് ചോദ്യങ്ങളുടെ മലവെളളപ്പാച്ചില്‍ ഉണ്ടായിട്ടും മൗനം പാലിക്കുന്നത്. ഇന്ത്യന്‍ ക്രിക്കറ്റ് ടീമിന്റെ നായകന്‍ എന്നത് വെറുമൊരു പദവിയല്ലെന്നതും ധോണിയുടെ മൗനത്തിന് പുതിയ വ്യാഖ്യാനങ്ങള്‍ നല്‍കുന്നു. ബി സി സി ഐയുടെ വിലക്കുളളപ്പോള്‍ തന്നെ, ഇന്ത്യന്‍ ക്രിക്കറ്റിനെ സാരമായി ബാധിക്കുന്ന ആരോപണത്തില്‍ ധോണി മറുപടി പറയേണ്ടത് അനിവര്യതയാണ്. അല്ലാത്തപക്ഷം , ധോണിക്കും ഇതില്‍ പങ്കുണ്ടെന്ന് വിശ്വസിക്കേണ്ടിവരും. ഈ വിശ്വാസം സാധൂകരിക്കത്തക്ക വിധത്തിലാണിപ്പോള്‍ കാര്യങ്ങളുടെ പോക്ക്.

ചെന്നൈ സൂപ്പര്‍ കിംഗ്‌സാണിപ്പോള്‍ ഒത്തുകളിയുമായി ബന്ധപ്പെട്ട് വിവാദക്കടലില്‍ പെട്ടിരിക്കുന്നത്. ടീം പ്രിന്‍സിപ്പല്‍ ഗുരുനാഥ് മെയ്യപ്പന്‍ അറസ്റ്റിലായിക്കഴിഞ്ഞു. മെയ്യപ്പന്‍ വാതുവയ്പില്‍ പങ്കാളിയായെന്നും തെളിവുകള്‍ ലഭിച്ചു. ഈ ടീം ബി സി സി ഐ പ്രസിഡന്റ് എന്‍ ശ്രീനിവാസന്റെ ഉടമസ്ഥതയില്‍ ഉളളതാണ്. ഇന്ത്യാ സിമന്റ്‌സ് എന്ന കമ്പനിയുടെ പേരിലാണ് സി എസ് കെ ടീമുളളത്. ഇന്ത്യാ സിമന്റ്‌സിന്റെ വൈസ് പ്രസിഡന്റാണ് ധോണി. അപ്പോള്‍ ധോണി-ശ്രീനിവാസന്‍-മെയ്യപ്പന്‍ ബന്ധം പകല്‍പോലെ വ്യക്തം.

ധോണി-ശ്രീനിവാസന്‍-മെയ്യപ്പന്‍ എന്നിവര്‍ അറിഞ്ഞുകൊണ്ടു മാത്രമേ സി എസ് കെയില്‍ എന്തും സംഭവിക്കൂ. ഇങ്ങനെയെങ്കില്‍ ഒത്തുകളി ധോണിയും അറിഞ്ഞിരിക്കും. ധോണിയെയും മരുമകനെയും സംരക്ഷിക്കുന്നതിന്റെ ഭാഗമായാണ് ശ്രീനിവാസന്‍ പ്രസിഡന്റ് സ്ഥാനത്തുനിന്ന് ഒഴിയാത്തത്. അന്വേഷണ കമ്മീഷന്‍ എല്ലാ കാര്യങ്ങളും പരിശോധിക്കും എന്നാണ് ശ്രീനിവാസന്റെ വിശദീകരണം. ശ്രീനിവാസന്‍ അധ്യക്ഷനായിരിക്കേ, ബോര്‍ഡ് നടത്തുന്ന അന്വേഷണം എത്രമാത്രം നീതിയുക്തമായിരിക്കും എന്ന് ചിന്തിക്കാവുന്നതേയുളളൂ.

ചെന്നൈ സൂപ്പര്‍ കിംഗ്‌സ് അവിഹിത ഇടപാടുകള്‍ നടത്തിയിട്ടുണ്ടെന്ന് തന്നെയാണ് കരുതേണ്ടത്. അല്ലെങ്കില്‍ എന്തുകൊണ്ട് അന്വേഷണം കഴിയുംവരെയെങ്കിലും ശ്രീനിവാസന് തല്‍സ്ഥാനത്തുനിന്ന് മാറിനിന്നുകൂടാ. ഇതേപശ്ചാത്തലത്തിലാണ് ധോണിയുടെ മേലും സംശയത്തില്‍ കരിനിഴല്‍ വീഴുന്നത്.

വാതുവയ്പിന് പിടിയിലായ ബോളിവുഡ് നടന്‍ വിന്ദു ധാരാസിംഗും ധോണിയുടെ ഭാര്യ സാക്ഷി റാവത്തും ചെന്നൈയുടെ മത്സരം കാണാന്‍ ഒരുമിച്ചിരുന്നത് ലോകം മുഴുവന്‍ കണ്ടുകഴിഞ്ഞു. വി വി ഐ പി പവലിയനില്‍ വിന്ദു എങ്ങനെ എത്തി എന്നതും ഇവരുടെ ബന്ധം വ്യക്തമാക്കുന്നത്. ഇതേക്കുറിച്ച് നിഷേധം നടത്താന്‍പോലും ധോണി തയ്യാറായിട്ടില്ല. ആളുകള്‍ അങ്ങനെ പലതും പറയുമെന്ന് മാത്രമായിരുന്നു വിവാദങ്ങളെക്കുറിച്ച് സാക്ഷിയുടെ പ്രതികരണം.

ധോണിയുടെ മൗനം ഇന്ത്യന്‍ ക്രിക്കറ്റിനെ ആകെയാണ് ബാധിക്കുക. ഐ പി എല്ലിന്റെ ആരവം അടങ്ങുംമുന്‍പ് ഇന്ത്യ ചാമ്പ്യന്‍സ് ട്രോഫിയില്‍ കളിക്കാനിറങ്ങുകയാണ്. ഒത്തുകളിയെന്ന ദുര്‍ഭൂതം ടീം ഇന്ത്യയെ വേട്ടയാടും എന്നുറപ്പാണ്. അതിനപ്പുറത്ത് മാധ്യമവിചാരണയും ടീം ഇന്ത്യയുടെ ഉറക്കംകെടുത്തും. ധോണിയുടെ വിശദീകരണത്തിലൂടെ ഒരുപരിധിവരെ ഇതിനൊക്കെ മറുപടി കണ്ടെത്താനാവും. എന്നാല്‍ ധോണി മൗനം പാലിക്കുന്നതിലൂടെ സംശയം വര്‍ധിക്കുകയാണ്, ആരോപണങ്ങളും.

എന്തൊക്കെയോ മറയ്ക്കാനുളളതിനാലാണ് ധോണിയുടെ മൗനമെന്നാണ് കരുതേണ്ടത്. ഒത്തുകളിയെ തളളിപ്പറയാന്‍പോലും ധോണി തയ്യാറാവാത്തതും അതുകൊണ്ടുതന്നെയാവണം. രാഹുല്‍ ദ്രാവിഡ്, കീര്‍ത്തി ആസാദ്, മനീന്ദര്‍ സിംഗ് എന്നിവര്‍ മാത്രമാണ് ഇതിനെതിരെ രംഗത്തെത്തിയത്. കപില്‍ ദേവ്, കെ ശ്രീകാന്ത്, സച്ചിന്‍ ടെന്‍ഡുല്‍ക്കര്‍, സുനില്‍ ഗാവസ്‌കര്‍, രവി ശാസ്ത്രി എന്നിവരെല്ലാം ഇക്കാര്യത്തില്‍ മൗനം പാലിക്കുകയാണ്. ശ്രീനിവാസന്‍ രാജിവയ്ക്കണം എന്നുപറയാനുളള ധീരതപോലും ഇതിഹാസ താരങ്ങള്‍പോലും തയ്യാറാവുന്നില്ല. ബി സി സി ഐ നല്‍കുന്ന കോടിക്കണക്കിന് രൂപ ഇല്ലാതാവും എന്ന ഭയം മാത്രമാണ് ഈ മൗനത്തിന് പിന്നില്‍. അതോടെ ഒരുകാര്യം വ്യക്തം. പണമാണ് എല്ലാം ഭരിക്കുന്നത്. നീതിയും സത്യവുമെല്ലാം അധികാരത്തിനും പണത്തിനും മുന്നില്‍ തമസ്‌കരിക്കപ്പെടും.

May 23, 2013

ക്രിക്കറ്റ് മാന്യന്‍മാരുടെ കളി തന്നെയാണ്


ഇന്ത്യന്‍ പ്രിമിയര്‍ ലീഗില്‍ എസ് ശ്രീശാന്ത് അടക്കം മൂന്ന് കളിക്കാര്‍ ഒത്തുകളിക്ക്പിടിക്കപ്പെട്ടതോടെ ആ പഴകിത്തേഞ്ഞ ചോദ്യം വീണ്ടും സജീവമായി. ക്രിക്കറ്റ് മാന്യന്‍മാരുടെ കളിയാണോ എന്ന പഴഞ്ചന്‍ ചോദ്യം. ക്രിക്കറ്റ് മാന്യന്‍മാരുടെ കളിയല്ലെന്ന് വരുത്തിത്തീര്‍ക്കാന്‍ കാര്യകാരണങ്ങളുടെ ഘോഷയാത്രയും പിന്നാലെ വന്നു.

സത്യത്തില്‍ ഇത് ക്രിക്കറ്റിന്റെ മാത്രം കുഴപ്പമാണോ?. ലോകത്തിനാകെ സംഭവിച്ച അപചയത്തിന്റെ ഭാഗം മാത്രമല്ലേ ക്രിക്കറ്റിലും സംഭവിച്ചത്. അല്ലാതെ ക്രിക്കറ്റിന് മാത്രമായി അപചയം ഇവിടെ സംഭവിച്ചോ?. കരുതിക്കൂട്ടി കാടടച്ച് വെടിവയ്ക്കുന്നതില്‍ കഴമ്പുണ്ടോ?. തീര്‍ച്ചയായും ഇല്ലെന്നാണ് ഈയുളളവന്റെ അഭിപ്രായം. നിങ്ങള്‍ക്ക് യോജിക്കാം വിയോജിക്കാം. എങ്കിലും ക്രിക്കറ്റ് മാന്യന്‍മാരുടെ കളിയല്ലാതായി മാറി എന്ന വാദക്കാരോടുളള എന്റെ വിയോജനക്കുറിപ്പാണിത്.

എസ് ശ്രീശാന്ത്, അങ്കിത് ചവാന്‍, അജീത് ചാന്തില എന്നിവര്‍ രാജസ്ഥാന്‍ റോയല്‍സിനെയും ക്രിക്കറ്റിനെയും കാശ് മുടക്കിയും അല്ലാതെയും കളികാണുന്നവരെയും വഞ്ചിച്ചു എന്നതില്‍ തര്‍ക്കമില്ല. രാജ്യത്ത് കിട്ടാവുന്നതില്‍ വച്ചേറ്റവും വലിയ ശിക്ഷ മാതൃകാപരമായി ഇവര്‍ക്ക് നല്‍കുകയും വേണം. ഇക്കാര്യത്തില്‍ ലേഖകന് രണ്ടഭിപ്രായമില്ല. പക്ഷേ, ഈ വാതുവയ്പുകൊണ്ട് ക്രിക്കറ്റ് മാന്യന്‍മാരുടെ കളി അല്ലാതാവുന്നില്ല.

ഇരുന്നൂറിലധികം കളിക്കാര്‍ ഒന്‍പത് ടീമുകളിലായി ഐ പി എല്ലില്‍ കളിക്കുന്നുണ്ട്. ഇതില്‍ മൂന്ന് പേരാണ് പിടിക്കപ്പെട്ടത്. ഒരുപക്ഷേ, കുറേക്കളിക്കാര്‍കൂടെ പിടിക്കപ്പെട്ടേക്കാം. അപ്പോഴും അതെങ്ങനെ കളിയുടെ കുഴപ്പമാവും. ദുരാഗ്രഹികളായ കളിക്കാരുടെ കുഴപ്പത്തിന് കളിയെന്ത് പിഴച്ചു. നമ്മുടെ സമൂഹത്തിന്റെ പരിച്ഛേദം തന്നെയാണ് ക്രിക്കറ്റ് ലോകവും. എല്ലാത്തരത്തിലുമുളള മനുഷ്യരെയും കളിക്കാര്‍ക്കിടയിലും കാണാം. അപ്പോള്‍ ഒത്തുകളി തികച്ചും വ്യക്തിപരമോ അല്ലെങ്കില്‍ ചില ആളുകളുടെയോ ദുരാഗ്രഹം മാത്രമാണ്.

നമ്മള്‍ ഒരുകുട്ട ആപ്പിള്‍ വാങ്ങുമ്പോള്‍ അതില്‍ ഒന്നോ രണ്ടോ ചീഞ്ഞ ആപ്പിള്‍ കണ്ടേക്കാം. എന്നുകരുതി ആ കുട്ടമുഴുവനായി നമ്മള്‍ ഉപേക്ഷിക്കാറില്ല. രുചിയോടെ മറ്റ് ആപ്പിളുകള്‍ ഭക്ഷിക്കുകയും ചെയ്യും. ഇതുപോലെ ഒത്തുകളിക്കാരെ ശിക്ഷിക്കുകയാണ് വേണ്ടത്. ക്രിക്കറ്റ് പ്രേമികള്‍ ഒത്തുകളിക്കാരെയല്ല ഇഷ്ടപ്പെടുന്നത്. കളിയുടെ ആവേശത്തെയാണ്.

ഒത്തുകളി ഇന്നോ ഇന്നലെയോ തുടങ്ങിയതല്ല. മനുഷ്യന്‍ സമൂഹമായി ജീവിക്കാന്‍ തുടങ്ങിയ കാലത്ത് തുടങ്ങിയതാണ് ഈ ഏര്‍പ്പാട്. ക്രിക്കറ്റില്‍ മാത്രമല്ല, ജീവിതത്തിന്റെ സമസ്ത മേഖലയിലും ഇത് കാണാം. എന്നുവച്ച് നാം അതെല്ലാം ഉപേക്ഷിക്കാറില്ല. രാഷ്ട്രീയത്തിലും മതത്തിലും വ്യവസായത്തിലുമെല്ലാം ഒത്തുകളി സര്‍വസാധാരണമാണ്. മനുഷ്യന്‍ ജന്മനാ അത്യാഗ്രഹിയാണ്. അല്ലാത്തവര്‍ വിരളമായിരിക്കും. ഈ ആഗ്രഹത്തെ നിയന്ത്രിക്കാനുളള ശ്രമമാണ് ഒരര്‍ഥത്തില്‍ ജീവിതത്തിലെ ഏറ്റവും വലിയ പോരാട്ടം. ഈ പോരാട്ടത്തില്‍ തളരുന്നവര്‍ ഒത്തുകളിക്കും മറ്റ് കുത്സിത പ്രവര്‍ത്തനങ്ങള്‍ക്കും പുറകേ പോകുന്നതില്‍ അത്ഭുതമില്ല. മിക്കതും നമ്മള്‍ അറിയാത്തതിനാല്‍ എല്ലാം മാന്യതയുടെ മുഖംമൂടിയണിഞ്ഞിരികുന്നു എന്നുമാത്രം.

രാഷ്ട്രീയക്കാരുടെ കാര്യം തന്നെനോക്കൂ. അഴിമതി നടത്താത്ത എത്ര നേതാക്കള്‍ നമ്മുടെ നാട്ടിലുണ്ട്. കണക്കുകൂട്ടാന്‍പോലും പ്രയാസമുളളത്രയും കോടികളാണ് അഴിമതിയിലൂടെ നാടിനെ നന്നാക്കാന്‍ ഇറങ്ങിപ്പുറപ്പെട്ടവര്‍ സ്വന്തം അക്കൗണ്ടുകളിലേക്ക് ഒഴുക്കുന്നത്. രാഷ്ട്രീയപ്രബുദ്ധത പ്രസംഗിക്കുന്നവര്‍ ഇതൊക്കെ വിഴുങ്ങി രാഷ്ട്രീയക്കാരുടെ വാലാട്ടികളായി പോകുന്നില്ലേ?. അങ്ങനെയെങ്കില്‍ രാഷ്ട്രീയം ഇപ്പോള്‍ മാന്യന്‍മാരുടെ ഇടപാടാണോ?.

ലോകത്തില്‍ ഏറ്റവുമധികം മനുഷ്യരുടെ ജീവന്‍ അപഹരിച്ചത് ഇവിടെയുളള വിവിധ മതങ്ങളാണ്. മതങ്ങളുടെ പേരില്‍ ഇന്നും നിരവധിപ്പേര്‍ കൊല്ലപ്പെടുന്നു. എന്നിട്ടും ലോകം മതത്തിന് പിന്നാലെ പായുന്നു. മതപുരോഹിതരുടെ കാര്യമോ?. വേദങ്ങളെ ഉദ്ധരിച്ച് പ്രബോധനം നടത്തുന്ന പുരോഹിതന്മാരുടെ സ്വകാര്യജീവിതം (എല്ലാവരുടേയുമല്ല) എല്ലാവര്‍ക്കും അറിയാവുന്നതാണ്. എല്ലാംഅറിഞ്ഞിട്ടും ഒന്നും കണ്ടില്ലെന്ന് നടിക്കുന്നതിന് മാസ്റ്റര്‍ ഡിഗ്രിയുളള നമ്മള്‍ക്ക് അപ്പോഴും കുഴപ്പമൊന്നുമില്ല. മതം ഇപ്പോള്‍ മാന്യന്‍മാരുടെ ഇടപാടാണോ?.

ലോകത്തിന്റെ കാവലാളുകളായ മാധ്യമപ്രവര്‍ത്തകരുടെ കാര്യവും വ്യത്യസ്തമല്ല. പണംവാങ്ങി വാര്‍ത്ത നല്‍കുന്നതും പണംവാങ്ങി വാര്‍ത്ത നല്‍കാതിരിക്കുന്നതും പരസ്യമായ രഹസ്യമാണ്. അപ്പോള്‍ മാധ്യമപ്രവര്‍ത്തനം മാന്യന്‍മാരുടെ ഇടപാടാണോ?.

ലോകത്തെ ഏറ്റവും ജനനപ്രിയ കളിയാണ് ഫുട്‌ബോള്‍. ഇറ്റാലിയന്‍ ഫുട്‌ബോള്‍ എന്നും ഒത്തുകളി വിവാദത്തിന്റെ നിഴലിലാണ്. മൂന്ന് വര്‍ഷം മുന്‍പ് സെരി എ ചാമ്പ്യന്‍മാരായ യുവന്റസിനെ രണ്ടാം ഡിവിഷനിലേക്ക് ഒത്തുകളിയെത്തുടര്‍ന്ന് തരംതാഴ്ത്തി. സാക്ഷാല്‍ ലയണല്‍ മെസ്സിയും ക്രിസ്റ്റ്യാനോ റൊണാള്‍ഡോയും കളിക്കുന്ന സ്പാനിഷ് ലീഗും ഇത്തവണ ഒത്തുകളി ആരോപണം നേരിട്ടിരിക്കുന്നു. ഇക്കാര്യത്തില്‍ സ്‌പെയ്‌നില്‍ അന്വേഷണം പുരോഗമിക്കുകയാണ്. ഫുട്‌ബോളില്‍ മാത്രമല്ല മറ്റ് കളികളിലും ഈ ഒത്തുകളിയെ നമുക്ക് അവഗണിക്കാനാവില്ല. കാരണം അത് യാഥാര്‍ഥ്യമാണ്. നന്‍മയും തിന്‍മയും ഉണ്ടെങ്കില്‍ സത്യവും അസത്യവും ഉണ്ടെങ്കില്‍ ഒത്തുകളിയും ചതിയും വഞ്ചനയുമെല്ലാം യാഥാര്‍ഥ്യമാണ്. അതുംകൂടി ചേര്‍ന്നതാണല്ലോ ഈ ലോകം. അപ്പോള്‍ ക്രിക്കറ്റ് എന്ന കളിമാത്രം ഇതില്‍നിന്നെങ്ങനെ മുക്തമാവും.

ലോകം മാറിക്കഴിഞ്ഞു. സുഖജീവതിമാണ് എല്ലാവരുടെയും ലക്ഷ്യം. അപ്പോള്‍ അടിച്ചുപൊളിക്കാനും ഇടിച്ച് നിരത്താനുമെല്ലാം കൈനിറയെ പണം വേണം. അതിന് ഏത് മാര്‍ഗവും സ്വീകരിക്കാന്‍ മനുഷ്യരിലെ ഒരുകൂട്ടര്‍ ഒരുക്കമാണ്. അക്കൂട്ടത്തില്‍പ്പെട്ടവരാണ് ക്രിക്കറ്റിലെ ഒത്തുകളിക്കാര്‍.

ഒത്തുകളിക്കാരെ ന്യായീകരിക്കുകയല്ല, മറിച്ച് ക്രിക്കറ്റിനെ, മറ്റ് കളികളെ, മാന്യന്‍മാരായ കളിക്കാരെയാണ് ഞാന്‍ ന്യായീകരിക്കുന്നത്. മൂന്നോ നാലോ പേര്‍ ചൂതാട്ടം നടത്തുന്നതിന് കളിയോ നല്ല കളിക്കാരോ ബലിയാടുകളാവരുത്. രാഹുല്‍ ദ്രാവിഡ് എന്ന ക്രിക്കറ്ററെ നോക്കുക. ഇന്ത്യന്‍ ക്രിക്കറ്റില്‍ ഇത്രയേറെ ബഹുമാനം  നേടിയ കളിക്കാരന്‍ സമീപകാലത്തുണ്ടായിട്ടില്ല. കളിക്കളത്തിനകത്തും പുറത്തും തികഞ്ഞ മാന്യന്‍. എസ് ശ്രീശാന്തിനെപ്പോലുളള ദുരാഗ്രഹികള്‍ കോഴവാങ്ങുമ്പോള്‍ ദ്രാവിഡിനെപ്പോലുളളവരെയും ബാധിക്കുന്നു. ഇത് തടയേണ്ടത് കളിയെ നിയന്ത്രിക്കുന്നവരാണ്.

വ്യക്തികളാണ് പ്രധാനം. വ്യക്തികളുടെ അപചയത്തിന് ക്രിക്കറ്റിനെ കുറ്റംപറഞ്ഞിട്ട് കാര്യമില്ല. വ്യക്തികളുടെ അപചയം ഉണ്ടാവാതെ നോക്കേണ്ടത് കളിസംഘടനകളാണ്.  കാരണം, പെട്ടെന്ന് പണക്കാരാവുമ്പോല്‍ പലരും സ്വയംനിയന്ത്രണ രേഖയില്‍ നിന്ന് കുതറിപ്പോവുന്നു. ആക്രാന്തം അവരെ തെറ്റായ വഴികളിലേക്ക് നയിച്ചേക്കും. ഇവിടെയാണ് കളിമേലാളരുടെ നിയന്ത്രണ രേഖ വേണ്ടത്. ആ വര വരച്ചില്ലെങ്കില്‍ മാന്യന്‍മാരായ കളിക്കാരും കളങ്കിതരുടെ നിഴലില്‍ ആവും.

Keywords: Cricket, match fixing, spot fixing, bookies, Mohammad Azharuddin, Hansie Cronje, Kapil Dev, Manoj Prabhakar, Herschelle Gibbs, Ajay Jadeja, Indian cricket, Cricket in India, BCCI, cricket in Pakistan, s reeshanth, IPL 2013

May 21, 2013

ആന്‍ഡേഴ്‌സന്‍ മുന്നൂറിന്റെ തിളക്കത്തില്‍


ക്രിക്കറ്റ് ലോകം ഇന്ത്യന്‍ പ്രിമിയര്‍ ലീഗിന്റെ പിന്നാലെയാണ്. കളിയേക്കാള്‍ ഐ പി എല്ലിലെ കളിക്ക് പുറത്തുളള കളികളാണ് വാര്‍ത്തകളില്‍ നിറയുന്നത്. എസ് ശ്രീശാന്തും അങ്കിത് ചവാനും അജിത് ചാന്ദിലയും ഐ പി എല്ലിന് മുന്‍പില്ലാത്തവിധം കുപ്രസിദ്ധി നേടിക്കൊടുത്തു. മാധ്യമപ്പടയും ഈ ഒറ്റുകാര്‍ക്കും അവരുടെ വാലാട്ടികള്‍ക്കും പിന്നാലെ പായുകയായിരുന്നു. ഇതിനിടയിലും കായികലോകത്ത് പലതും നടക്കുന്നുണ്ടായിരുന്നു. കടുത്ത ക്രിക്കറ്റ് പ്രേമികള്‍പോലും ഇതൊക്കെ അറിഞ്ഞുവോ എന്ന് സംശയം.

ക്രിക്കറ്റിന്റെ മെക്കയായ ലോര്‍ഡ്‌സില്‍ ഇംഗ്ലണ്ട് - ന്യൂസിലാന്‍ഡ് ഒന്നാം ക്രിക്കറ്റ് ടെസ്റ്റ് പൂര്‍ത്തിയായി. ഇംഗ്ലണ്ട് മിന്നും വിജയം സ്വന്തമാക്കി. ഈ ടെസ്റ്റില്‍ ജയിംസ് ആന്‍ഡേഴ്‌സന്‍ ടെസ്റ്റ് ക്രിക്കറ്റില്‍ 300 വിക്കറ്റ് തികച്ചു. ഒട്ടുമിക്ക മലയാള പത്രങ്ങള്‍ക്കും ഇത് വാര്‍ത്തപോലും ആയിരുന്നില്ല. അവരപ്പോഴും ഗോപുമോന്റെ അടുക്കളക്കാര്യങ്ങളും കിടപ്പറകാര്യങ്ങളും തിരയുകയായിരുന്നു.

സമീപകാല ഇംഗ്ലീഷ് ക്രിക്കറ്റിലെ ഏറ്റവും മികച്ച പേസ് ബൗളറാണ് ആന്‍ഡേഴ്‌സന്‍. ന്യൂസിലാന്‍ഡിനെതിരെ മുന്നൂറ് വിക്കറ്റ് തികച്ചത് ഇത് അടിവരയിടുന്ന പ്രകടനമാണ്. മാത്രമല്ല, ഈ നേട്ടം കൈവരിക്കുന്ന നാലാമത്തെ ബൗളര്‍മാത്രമാണ് ആന്‍ഡേഴ്‌സന്‍. ക്രിക്കറ്റ് ചരിത്രത്തിലെ ഇരുപത്തിയാറമത്തെ ബൗളറും.

തന്റെ എണ്‍പത്തിയൊന്നാമത്തെ ടെസ്റ്റിലാണ് ആന്‍ഡേഴ്‌സന്‍ 300 വിക്കറ്റ് ക്ലബിലെത്തിയത്. പീറ്റര്‍ ഫുള്‍ടനായിരുന്നു മുന്നൂറാമത്തെ ഇര. 2003ല്‍ സിംബാംബ് വേയ്‌ക്കെതിരെ ആയിരുന്നു ആന്‍ഡേഴ്‌സന്റെ ടെസ്റ്റ് അരങ്ങേറ്റം. 298 വിക്കറ്റുമായാണ് ആന്‍ഡേഴ്‌സന്‍ ലോര്‍ഡ്‌സ് ടെസ്റ്റിനിറങ്ങിയത്. ടെസ്റ്റില്‍ അരങ്ങേറ്റം കുറിച്ച ലോര്‍ഡ്‌സില്‍ തന്നെയാണ് ആന്‍ഡേഴ്‌സന്‍ മൂന്നൂറ് വിക്കറ്റ് നേട്ടം കൈവരിച്ചതും.

ഇയാന്‍ ബോതം, ബോബ് വില്ലിസ്, ഫ്രെഡ് ട്രൂമാന്‍ എന്നിവരാണ് ആന്‍ഡേഴ്‌സന് മുന്‍പ് 300 വിക്കറ്റ് നേട്ടം കൈവരിച്ച ഇംഗ്ലീഷ് ബൗളര്‍മാര്‍. ബോതം 383 വിക്കറ്റുകളും ട്രൂമാന്‍ 307 വിക്കറ്റുകളും  വില്ലിസ് 325 വിക്കറ്റുകളുമാണ് നേടിയത്. 800 വിക്കറ്റ് നേടിയ മുത്തയ്യ മുരളീധരനാണ് ടെസ്റ്റ് വിക്കറ്റ് വേട്ടയിലെ ഒന്നാമന്‍. ഷെയ്ന്‍ വോണ്‍ (708), അനില്‍ കുംബ്ലെ (619) എന്നിവരാണ് രണ്ടും മൂന്നും സ്ഥാനങ്ങളില്‍.

ഗ്ലെന്‍ മഗ്രാത്തും കോര്‍ട്‌നി വാല്‍ഷും അഞ്ഞൂറ് വിക്കറ്റ് ക്ലബിലെ അംഗങ്ങളാണ്. ഇപ്പോള്‍ കളിക്കുന്നവരില്‍ ഹര്‍ഭജന്‍ സിംഗാണ് വിക്കറ്റ് വേട്ടയില്‍ മുന്നില്‍, 413 വിക്കറ്റുകള്‍. ഡാനിയേല്‍ വെട്ടോറി 360 വിക്കറ്റുകളും ഡെയ്ല്‍ സ്‌റ്റെയ്ന്‍ 332 വിക്കറ്റുകളും നേടിയിട്ടുണ്ട്.

ടെസ്റ്റ് ക്രിക്കറ്റില്‍ അരങ്ങേറ്റം നടത്തി പത്താം വര്‍ഷത്തിലാണ് ആന്‍ഡേഴ്‌സന്‍ 300 വിക്കറ്റ് തികച്ചത്. പരിക്കും മോശം ഫോമും അലട്ടിയില്ലായിരുന്നെങ്കില്‍ ആന്‍ഡേഴ്‌സന്‍ ഇതിന് മുന്‍പേ ഈ നേട്ടം കൈവരിച്ചേനെ. ദക്ഷിണാഫ്രിക്കയ്ക്കും ഇന്ത്യക്കുമെതിരെയുമാണ് ആന്‍ഡേഴ്‌സന്‍ കൂടുതല്‍ വിക്കറ്റുകള്‍ നേടിയിട്ടുളളത്. 57 വിക്കറ്റുകള്‍ വീതം. ഓസ്‌ട്രേലിയയുടെ 41 വിക്കറ്റുകളും വെസ്റ്റ് ഇന്‍ഡീസിന്റെ 36 വിക്കറ്റുകളും ന്യൂസിലാന്‍ഡിന്റെ 39 വിക്കറ്റുകളും പാകിസ്ഥാന്റെ 32 വിക്കറ്റുകളും ശ്രീലങ്കയുടെ 18 വിക്കറ്റുകളും സിംബാബ് വേയുടെ 11 വിക്കറ്റുകളും ബംഗ്ലാദേശിന്റെ ഒന്‍പത് വിക്കറ്റുകളും ആന്‍ഡേഴ്‌സന്റെ പോക്കറ്റിലുണ്ട്.

സച്ചിന്‍ ടെന്‍ഡുല്‍ക്കറെയാണ് ആന്‍ഡേഴ്‌സന്‍ ഏറ്റവുമധികം പുറത്താക്കിയത്, 14 ടെസ്റ്റുകളില്‍ ഒന്‍പത് തവണ. ജാക് കാലിസിനെ ഏഴ് തവണയും ഗ്രേം സ്മിത്തിനെയും മാര്‍ക് ബൗച്ചറെയും മൈക്കല്‍ ക്ലാര്‍ക്കിനെയും കുമാര്‍ സംഗകാരയെയും ആറ് തവണ വീതവും പുറത്താക്കി.

Key Words: New Zealand batsman , Peter Fulton , First Test , Lords, Anderson , Ian Botham, Bob Willis,  Fred Trueman , Botham, England captain , Michael Vaughan , Test Match, Test debut, Zimbabwe,  Lord's, England shirt ,  New Zealand,  Peter Moores, England's coach , Ashes whitewash

May 19, 2013

ശ്രീശാന്ത് ക്ലീന്‍ ബൗള്‍ഡ്‌


ന്യൂഡല്‍ഹി : ഇന്ത്യന്‍ പ്രിമിയര്‍ ലീഗിലെ ഒത്തുകളിയുമായി ബന്ധപ്പെട്ട് അറസ്റ്റിലായതോടെ ദേശീയ ക്രിക്കറ്റില്‍ കേരളത്തിന്റെ മേല്‍വിലാസമായ എസ് ശ്രീശാന്തിന്റെ കളിജീവിതം അവസാനിക്കുന്നു. പ്രാഥമിക നടപടിയായി ബി.സി.സി.ഐ ശ്രീശാന്തിനെ സസ്‌പെന്റ് ചെയ്തു. ശീശാന്തിനൊപ്പം അറസ്റ്റ് ചെയ്ത രാജസ്ഥാന്‍ റോയല്‍സിന്റെ മറ്റ് രണ്ട് താരങ്ങളെയും ബി.സി.സി.ഐ സസ്‌പെന്റ് ചെയ്തിട്ടുണ്ട്.

ബി.സി.സി.ഐ വാര്‍ത്ത കുറിപ്പിലാണ് ഇക്കാര്യം പുറത്ത് വിട്ടത്. ഇത് വളരെ ഗൗരവമുള്ള വിഷയമാമെന്നും ആരോപണങ്ങള്‍ ശരിയാമെന്ന് തെളിഞ്ഞാല്‍ കളിക്കാര്‍ക്ക് ആജീവാന്ത വിലക്കേര്‍പ്പെടുത്തുമെന്നും ബി.സി.സി.ഐ വ്യക്തമാക്കി. ദക്ഷിണാഫ്രിക്കന്‍ പര്യടനത്തിലുളള ടീമിലേക്ക് പരിഗണിക്കവേയാണ് ശ്രീശാന്ത് കെണിയിലായത്. ശക്തമായ തെളിവുകളാണ് ഡല്‍ഹി പൊലീസ്  നിരത്തിയിരിക്കുന്നത്. അറസ്റ്റിന് മുന്‍പ് വിശദമായ അന്വേഷണം നടത്തിയിട്ടുണ്ടെന്നും തെളിവുകള്‍ ശേഖരിച്ചുവെന്നും വ്യക്തം.

കാര്യങ്ങള്‍ ഇത്രത്തോളമായതോടെ നിരപരാധിത്വം തെളിയിക്കണമെങ്കിലും ശ്രീശാന്തിന് നിരവധി കടമ്പകള്‍ കടക്കേണ്ടി വരും. ഇതിനിടെ ശ്രീശാന്തിന്റെ ക്രിക്കറ്റ് ജീവിതം അവസാനിക്കുമെന്നുറപ്പാണ്. രണ്ടായിരത്തിന്റെ തുടക്കത്തില്‍ കുറ്റാരോപിതനായ മുന്‍ ഇന്ത്യന്‍ ക്യാപ്റ്റന്‍ മുഹമ്മദ് അസ്ഹറുദ്ദിന്‍ കുറ്റവിമുക്തനാക്കപ്പെട്ടത് 2012ല്‍ ആയിരുന്നു. ഈ കാലതാമസം സ്വാഭാവികമായും ശ്രീശാന്തും നേരിടേണ്ടിവരും.

കുറ്റക്കാരനാണെന്ന് പൂര്‍ണമായും തെളിയിക്കപ്പെട്ടാല്‍ അത് കേരള ക്രിക്കറ്റിനെയും സാരമായി ബാധിക്കും. സഞ്ജു വി സാംസണ്‍ ഉള്‍പ്പടെയുളള യുവതാരങ്ങള്‍ ഐപിഎല്ലില്‍ ശ്രദ്ധേയ പ്രകടനം നടത്തുമ്പോഴാണ് ശ്രീശാന്ത് പിടിക്കപ്പെട്ടിരിക്കുന്നത്. മലായാളികളായ സഞ്ജുവും സച്ചിന്‍ ബേബിയുമെല്ലാം രാജസ്ഥാന്‍ റോയല്‍സിന്റെ താരങ്ങളാണ്.

സത്യസന്ധതയില്ലാത്ത കളിക്കാരാണ് വാതുവെപ്പില്‍ ഏര്‍പ്പെടുന്നതെന്ന് രാജസ്ഥാന്‍ റോയല്‍സ് ടീം സഹഉടമ രാജ് കുന്ദ്ര പ്രതികരിച്ചു. ഐ.പി.എല്ലില്‍ ഏതെങ്കിലും ടീം ഒന്നടങ്കം വാതുവെപ്പില്‍ ഏര്‍പ്പെടുമെന്ന് കരുതുന്നില്ലെന്നും ശ്രീശാന്ത്, അജിത് ചണ്ഡില, അങ്കിത് ചവാന്‍ എന്നിവരുടെ അറസ്റ്റിനെക്കുറിച്ച് പ്രതികരിക്കവെ കുന്ദ്ര പറഞ്ഞു. റോയല്‍സ് ഉടമ ശില്‍പ ഷെട്ടിയുടെ ഭര്‍ത്താവാണ് രാജ്.

May 17, 2013

ശ്രീശാന്ത്: വിവാദങ്ങളുടെ സഹയാത്രികന്‍


ഇന്ത്യന്‍ ക്രിക്കറ്റ് വീണ്ടും ഒത്തുകളിയുടെ വിവാദച്ചുഴിയില്‍ വട്ടംകറങ്ങുന്നു. അതിന് കാരണമായതില്‍ പ്രധാനി മലയാളിയായാണെന്നതാണ് ഇത്തവണത്തെ പ്രത്യേകത. മാറ്റാരുമല്ല, ഇന്ത്യന്‍ ക്രിക്കറ്റില്‍ കേരളത്തിന്റെ അടയാളമായ എസ് ശ്രീശാന്ത്. വിവാദങ്ങളുടെ സഹയാത്രികനാണ് ശ്രീശാന്ത്. അതുകൊണ്ടുതന്നെ ശ്രീശാന്തിന്റെ കുടുംബവും അഭിഭാഷകനും, ശ്രീശാന്ത് കുറ്റക്കാരനല്ലെന്ന് ആവര്‍ത്തിക്കുമ്പോഴും പൊതുജനത്തിന് വിശ്വാസം വരുന്നില്ല. മാത്രമല്ല, ഡല്‍ഹി പൊലീസ് അവതരിപ്പിച്ച തെളിവുകളാവട്ടെ, വിശ്വസിക്കാന്‍ പ്രേരിപ്പിക്കുന്നതുമാണ്. ശ്രീശാന്ത് കുറ്റക്കാരനാണെങ്കിലും അല്ലെങ്കിലും ഒരു കാര്യം ഉറപ്പാണ്, ശ്രീശാന്ത് എന്ന ക്രിക്കറ്ററുടെ രാജ്യാന്തര ക്രിക്കറ്റ് ജീവിതം ഏറക്കുറെ അസ്തമിച്ചിരിക്കുന്നു.

എട്ടുവര്‍ഷം മുന്‍പ് ഇന്ത്യന്‍ ടീമില്‍ അംഗമായത് മുതല്‍ ശ്രീശാന്ത് വിവാദങ്ങളുടെ സഹയാത്രികനാണ്. കളിക്കളത്തില്‍ മാത്രമല്ല, കളത്തിന് പുറത്തും ശ്രീശാന്ത് സംസാരത്തിലൂടെയും പെരുമാറ്റത്തിലൂടെയും വിവാദങ്ങളുണ്ടാക്കിക്കൊണ്ടിരുന്നു. അഹങ്കാരിയെന്നും ധിക്കാരിയെന്നും നാട്ടുകാരെക്കൊണ്ട് പറയിച്ചുകൊണ്ടിരുന്നു. മാത്രമല്ല, ദേശീയതലത്തില്‍ ശ്രദ്ധേയനായ മറ്റൊരുകളിക്കാരനും ഇത്രമാത്രം കുപ്രസിദ്ധി ഇന്ത്യന്‍ ചരിത്രത്തില്‍ കാണാനുമാവില്ല. ഇന്ത്യന്‍ ക്രിക്കറ്റ് കണ്ട എക്കാലത്തേയും മികച്ച സീം ബൗളറാണെന്ന സത്യം മറന്നുകൊണ്ടല്ല ഇത് പറയുന്നത്. പക്ഷേ, തന്റെ അനുഗ്രഹീത മികവിനെക്കാള്‍ എന്നും മുന്നിട്ടുനിന്നത് വിവാദങ്ങളായിരുന്നു.#

എതിര്‍ താരങ്ങളോടുള്ള മോശം പെരുമാറ്റം, കളിക്കളത്തിലെ അമിത ആഘോഷ പ്രകടനങ്ങള്‍, സഹതാരങ്ങളുമയുള്ള മോശം പെരുമാറ്റം, കളത്തിന് പുറത്തെ ്പ്രകടനങ്ങള്‍ അങ്ങനെ വിവാദങ്ങള്‍ നിരവധിയാണ്. ഏറ്റവുമൊടുവില്‍ വന്ന ഒത്തുകളി വിവാദം ഇതിനേക്കാളേറെ ആഘാതമുളളതാണ്. ഒരുപക്ഷേ. ജീവിതത്തില്‍ ഒരിക്കലും കരകയറാന്‍ കഴിയാത്ത കുഴിയിലാണ് ശ്രീശാന്ത് വീണിരിക്കുന്നത്. കോടതി നടപടി ക്രമങ്ങളിലൂടെ കുറ്റവിമുക്തനാക്കപ്പെട്ടാലും അപ്പോഴേക്കും ശ്രീശാന്തിന്റെ ക്രിക്കറ്റ് കാലം കഴിയുമെന്നുറപ്പാണ്. മാത്രമല്ല, ഒത്തുകളിക്കാരന്‍ എന്ന് ക്രിക്കറ്റ് പ്രേമികളുടെ മനസ്സിലേക്ക് വീണ തീപ്പൊരി അണയുകയുമില്ല.


ശ്രീലങ്കക്കെതിരെ 2005 ഒക്ടോബര്‍ 25ന് നാഗ്പൂരിലായിരുന്നു ശ്രീശാന്തിന്റെ ഏകദിന അരങ്ങേറ്റം.2006 മാര്‍ച്ച് ഒന്നിന് ഇംഗ്ലണ്ടിനെതിരെ ടെസ്റ്റിലും അരങ്ങേറ്റം കുറിച്ചു. ഇതും നാഗ്പൂരിലായിരുന്നു. സ്വിംഗിന് അനുകൂലമായ സാഹചര്യത്തില്‍ ഏറ്റവും മാരകമായ ബൗളറായിരുന്നു ശ്രീശാന്ത്. അടുത്തിടെ മുന്‍ ഇന്ത്യന്‍ കോച്ച് ഗ്രെഗ് ചാപ്പല്‍ ഇത് ആവര്‍ത്തിക്കുകയും ചെയ്തിരുന്നു. ഇതോടൊപ്പം, ശ്രീശാന്തിന്റെ പെരുമാറ്റം നിയന്ത്രിക്കുക പ്രയാസമായിരുന്നുവെന്നും ചാപ്പല്‍ ഓര്‍മിക്കുന്നു.

കളിക്കളത്തിലെ മോശം പ്രതികരണത്തിന് പലതവണ ശ്രീശാന്ത് ശാസിക്കപ്പെട്ടു. ഐ സി സിയും ടീം മാനേജ്‌മെന്റും ക്യാപ്റ്റനും മുതിര്‍ന്നതാരങ്ങളുമെല്ലാം ശ്രീശാന്തിനെ ശാസിച്ചിരുന്നു. ക്യാപ്റ്റന്‍ ധോണിക്ക് പലപ്പോഴും ശ്രീശാന്തിനെതിരെ പരസ്യമായി പ്രതികരിക്കേണ്ടിവന്നു. ഇതുകൊണ്ടൊന്നും ശ്രീശാന്ത് പാഠം പഠിച്ചില്ലെന്ന് മാത്രമല്ല, കൂടുതല്‍ കെണികളിലേക്ക് വീഴുകയും ചെയ്തു. കേരള ക്രിക്കറ്റ് അസോസിയേഷനുമായും ശ്രീശാന്തിന് മോശം ബന്ധമാണുളളത്. കെ സി എയെക്കാള്‍ ഉയരത്തിലാണ് താനെന്നായിരുന്നു ശ്രീശാന്തിന്റെ ചിന്ത. ഇത് അംഗീകരിക്കാന്‍ കെ സി എയും ഒരുക്കമായിരുന്നില്ല. അതോടെ, അവിടെയും പ്രശ്‌നങ്ങള്‍ സ്വാഭാവികം മാത്രം. ഇതിന്റെ തുടര്‍ച്ചയായി കേരള ടീമില്‍നിന്ന് പോലും ഒഴിവാക്കപ്പെട്ടു.

ആേ്രന്ദ നെല്‍, കെവിന്‍ പീറ്റേഴ്‌സന്‍, മൈക്കല്‍ വോണ്‍, റിക്കി പോണ്ടിംഗ്, മാത്യൂ ഹെയ്ഡന്‍, ആന്‍ഡ്രു സൈമണ്‍സ് എന്നിവരോടൊക്കെ കളിക്കളത്തില്‍ ശ്രീശാന്ത് കൊമ്പുകോര്‍ത്തു. ഇതില്‍ പലതും അനാവശ്യമായി ശ്രീശാന്ത് വിളിച്ചു വരുത്തുകയായിരുന്നു. ഇതിനെക്കാളേറെ വിവാദങ്ങളുണ്ടാക്കിയതാണ് ആദ്യ ഐ പി എല്ലില്‍ ഹര്‍ഭജന്‍ സിംഗിന്റെ അടി വാങ്ങിയത്. ഭാജിയുടെ അടിയേറ്റ് കരയുന്ന ശ്രീശാന്തിന്റെ മുഖം ക്രിക്കറ്റ് പ്രേമികളാരും മറക്കുമെന്ന് തോന്നുന്നില്ല. ബി സി സി ഐ ഇടപെട്ട് ഒത്തുതീര്‍പ്പാക്കിയെങ്കിലും അടുത്തിടെ ശ്രീശാന്ത് വീണ്ടും ഇതേ വിവാദം എടുത്തിട്ടു. ഭാജിയും സംഘവും കരുതിക്കൂട്ടി നടത്തിയ ആക്രമണമാണെന്നായിരുന്നു ശ്രീശാന്തിന്റെ വെളിപ്പെടുത്തല്‍. ഒത്തുകളിക്ക് പിടിക്കപ്പെട്ടതോടെ ഇതിന് പിന്നില്‍ ധോണിയും ഭാജിയുമാണെന്ന് ശ്രീശാന്തിന്റെ കുടുംബം ആരോപിക്കുകയും ചെയ്തു. ശ്രീശാന്തിന്റെ അഭിപ്രായം കുടുംബാംഗങ്ങളിലൂടെ പുറത്തുവരികയായിരുന്നുവെന്നും വ്യക്തം.

സംസാരിക്കുമ്പോഴൊക്കെ സച്ചിനെയും ദ്രാവിഡിനെയും ഗാംഗുലിയെയുമൊക്കെ വാഴ്ത്തുന്ന ശ്രീശാന്ത് അവരില്‍ നിന്ന് ഒന്നും പഠിച്ചില്ലെന്നത് ദുരന്തമായേ കാണാനാവു. കാരണം സച്ചിനൊപ്പം ഏറെക്കാലം ഒരുമിച്ച് കളിക്കാന്‍ ഭാഗ്യം ലഭിച്ചയാളാണ് ശ്രീശാന്ത്. മാത്രമല്ല, രാഹുല്‍ ദ്രാവിഡിന് കീഴിലാണ് ഇപ്പോള്‍ കളിക്കുന്നത്. അടിമുടി മാന്യനായ മനുഷ്യനാണ് ദ്രാവിഡ്. ആ ദ്രാവിഡിന് പോലും നാണക്കേടുണ്ടാക്കുന്നതായി ശ്രീശാന്തിന്റെ ഒത്തുകളി. വെറും നാല്‍പത് ലക്ഷം രൂപയ്ക്ക് ശ്രീശാന്തിന് നഷ്ടമായത് ജീവിതമാണ്. നാനൂറ് കോടി മുടക്കിയാലും ഇനി വിശ്വാസ്യത വീണ്ടെടുക്കാനാവുമെന്ന് തോന്നുന്നില്ല.

പ്രാഥമിക നടപടിയായി ബി.സി.സി.ഐ ശ്രീശാന്തിനെ സസ്‌പെന്റ് ചെയ്ത് കഴിഞ്ഞു. ശീശാന്തിനൊപ്പം അറസ്റ്റ് ചെയ്ത രാജസ്ഥാന്‍ റോയല്‍സിന്റെ മറ്റ് രണ്ട് താരങ്ങളെയും ബി.സി.സി.ഐ സസ്‌പെന്റ് ചെയ്തിട്ടുണ്ട്. ബി.സി.സി.ഐ വാര്‍ത്ത കുറിപ്പിലാണ് ഇക്കാര്യം പുറത്ത് വിട്ടത്. ഇത് വളരെ ഗൗരവമുള്ള വിഷയമാമെന്നും ആരോപണങ്ങള്‍ ശരിയാമെന്ന് തെളിഞ്ഞാല്‍ കളിക്കാര്‍ക്ക് ആജീവാന്ത വിലക്കേര്‍പ്പെടുത്തുമെന്നും ബി.സി.സി.ഐ വ്യക്തമാക്കി.

ദക്ഷിണാഫ്രിക്കന്‍ പര്യടനത്തിലുളള ടീമിലേക്ക് പരിഗണിക്കവേയാണ് ശ്രീശാന്ത് കെണിയിലായത്. ശക്തമായ തെളിവുകളാണ് ഡല്‍ഹി പൊലീസ്  നിരത്തിയിരിക്കുന്നത്. അറസ്റ്റിന് മുന്‍പ് വിശദമായ അന്വേഷണം നടത്തിയിട്ടുണ്ടെന്നും തെളിവുകള്‍ ശേഖരിച്ചുവെന്നും വ്യക്തം. കാര്യങ്ങള്‍ ഇത്രത്തോളമായതോടെ നിരപരാധിത്വം തെളിയിക്കണമെങ്കിലും ശ്രീശാന്തിന് നിരവധി കടമ്പകള്‍ കടക്കേണ്ടി വരും. ഇതിനിടെ ശ്രീശാന്തിന്റെ ക്രിക്കറ്റ് ജീവിതം അവസാനിക്കുമെന്നുറപ്പാണ്. രണ്ടായിരത്തിന്റെ തുടക്കത്തില്‍ കുറ്റാരോപിതനായ മുന്‍ ഇന്ത്യന്‍ ക്യാപ്റ്റന്‍ മുഹമ്മദ് അസ്ഹറുദ്ദിന്‍ കുറ്റവിമുക്തനാക്കപ്പെട്ടത് 2012ല്‍ ആയിരുന്നു. ഈ കാലതാമസം സ്വാഭാവികമായും ശ്രീശാന്തും നേരിടേണ്ടിവരും.

 ശ്രീശാന്ത് കുറ്റക്കാരനാണെന്ന് പൂര്‍ണമായും തെളിയിക്കപ്പെട്ടാല്‍ അത് കേരള ക്രിക്കറ്റിനെയും സാരമായി ബാധിക്കും. സഞ്ജു വി സാംസണ്‍ ഉള്‍പ്പടെയുളള യുവതാരങ്ങള്‍ ഐപിഎല്ലില്‍ ശ്രദ്ധേയ പ്രകടനം നടത്തുമ്പോഴാണ് ശ്രീശാന്ത് പിടിക്കപ്പെട്ടിരിക്കുന്നത്. മലായാളികളായ സഞ്ജുവും സച്ചിന്‍ ബേബിയുമെല്ലാം രാജസ്ഥാന്‍ റോയല്‍സിന്റെ താരങ്ങളാണ്.

27 ടെസ്റ്റുകളില്‍ നിന്ന് 87 വിക്കറ്റുകളും 53 ഏകദിനങ്ങളില്‍ നിന്ന് 75 വിക്കറ്റുകളുമാണ് ശ്രീശാന്തിന്റെ സമ്പാദ്യം. ദൗര്‍ഭാഗ്യകരമെന്ന് പറയട്ടെ, ശ്രീശാന്ത് എന്ന മലയാളി ക്രിക്കറ്ററുടെ കരിയര്‍ ഈ കണക്കുകളില്‍ അവാസാനിക്കുകയാണ്. അതിലേക്കാണ് ഡല്‍ഹി പൊലീസ് വഴിതെളിച്ചിരിക്കുന്നത്. സ്വയം വരുത്തിവച്ച വിനയിലൂടെ ശ്രീശാന്ത് പടുകുഴിയിലേക്ക് വീണത് ബാക്കിയുളളവര്‍ക്ക് ഞെട്ടിക്കുന്ന ഓര്‍മയാകുമെന്നെങ്കിലും പ്രതീക്ഷിക്കാം.

May 16, 2013

ഡേവിഡ് ബെക്കാം: കാല – ദേശങ്ങളില്ലാത്ത താരം


ലോകത്തെ ഏറ്റവും പ്രശസ്തനായ കായികതാരം പടിയിറങ്ങുന്നു- ഡേവിഡ് ബെക്കാം പ്രൊഫഷണല്‍ ഫുട്‌ബോളില്‍ നിന്ന് വിടവാങ്ങുന്നുവെന്ന് പ്രഖ്യാപിച്ചപ്പോള്‍ ഇംഗ്ലണ്ടിന്റെ മുന്‍കോച്ച് സ്വന്‍ ഗോരാന്‍ എറിക്‌സന്റെ പ്രതികരണം ഇങ്ങനെയായിരുന്നു. എറിക്‌സന്റെ ഈ പ്രതികരണത്തില്‍ ബെക്കാം എന്തായിരുന്നുവെന്ന് പൂര്‍ണമായും വ്യക്തമാവും. തന്റെ സമകാലിക സൂപ്പര്‍താരങ്ങളുടെ കളിമികവ് ഉണ്ടായിരുന്നില്ലെങ്കിലും ബെക്കാം ആയിരുന്നു താരം. ബെക്കാമിനെ സ്വന്തമാക്കാന്‍ ക്ലബുകള്‍ മത്സരിച്ചു. ബെക്കാമിന്റെ വിപണിമൂല്യം ഫുട്‌ബോള്‍ ചരിത്രത്തിലില്ലാത്ത വിധം അതിരുകള്‍ക്കപ്പുറത്തേക്ക് വ്യാപിച്ചു. ഇരുപത് വര്‍ഷത്തെ കളിജീവിതത്തില്‍ നിന്ന് ബൂട്ടഴിക്കുമ്പോഴും ബെക്കാം താരങ്ങളുടെ താരം തന്നെയാണ്.

ഇംഗ്ലീഷ് ഫുട്‌ബോളിലെയോ ലോക ഫുട്‌ബോളിലേയോ എക്കാലത്തേയും മികച്ച താരങ്ങളുടെ പട്ടികയില്‍ ബെക്കാമിന്റെ പേര് നമുക്ക് കണ്ടെത്താനായേക്കില്ല. പക്ഷേ, ലോകത്തെ ഏറ്റവും പ്രശസ്തനായ, ഫുട്‌ബോളിനെ കാലദേശങ്ങള്‍ക്ക് അപ്പുറത്തേക്ക് പടര്‍ത്തിയ താരങ്ങളുടെ പട്ടികയില്‍ ഒന്നാമനായിരിക്കും ബെക്കാം. ഫുട്‌ബോളിലെ എക്കാലത്തേയും മികച്ച അംബാസഡര്‍ എന്ന പദവിയും ബെക്കാം എന്ന പേരിനപ്പുറത്തേക്ക് പോവുക പ്രയാസമായിരിക്കും. ഇത് തന്നെയാണ് ബെക്കാം എന്ന താരത്തെ ലോകത്തിന്റെ പ്രിയതാരമാക്കുന്നതും.

ബെക്കാം വിരമിച്ചു എന്ന വാര്‍ത്ത വന്നപ്പോള്‍ സോഷ്യല്‍ നെറ്റ് വര്‍ക്കിംഗ് സൈറ്റുകളില്‍ പിന്നെ മറ്റൊന്നുമുണ്ടായിരുന്നില്ല. ബെക്കാം വീണ്ടും വിരമിച്ചോ?. റയല്‍ മാഡ്രിഡില്‍ നിന്ന് ലോസാഞ്ചലസ് ഗാലക്‌സിയിലേക്ക് പോയത് തന്നെ വിരമിക്കല്‍ ആയിരുന്നില്ലേ തുടങ്ങി അഭിപ്രായ-അഭിനന്ദന പ്രവാഹങ്ങളായിരുന്നു പിന്നീട്.  അഭിപ്രായ സ്വാതന്ത്ര്യം തോന്നിയപോലെ വാപിളരുന്നതിനിടെയും ബെക്കാം താരമായിത്തന്നെ തിളങ്ങുന്നു.

ഈ സീസണ്‍ അവസാനത്തോടെയാണ് മത്സരഫുട്‌ബോളില്‍ നിന്ന് ബെക്കാം വിടവാങ്ങുന്നത്.  38കാരനായ ബെക്കാം ഫ്രഞ്ച് ക്ലബായ പാരിസ് സെന്റ് ജെര്‍മെയ്‌ന്റെ കളിക്കാരനാണ്. പി എസ് ജിക്ക് ഈ സീസണില്‍ രണ്ട് മത്സരങ്ങള്‍ കൂടി ശേഷിക്കുന്നുണ്ട്. മേയ് 26ന് ലോറിയന്റിനെതിരെയാണ് ബെക്കാമിന്റെ അവസാന മത്സരം. ഇരുപത് വര്‍ഷം നീണ്ട കരിയറിനിടെ ബെക്കാം ഇംഗ്ലണ്ടിന് വേണ്ടി 115 മത്സരങ്ങളില്‍ ബൂട്ടണിഞ്ഞു.

മാഞ്ചസ്റ്റര്‍ യുണൈറ്റഡ് , റയല്‍ മാഡ്രിഡ്, ലോസാഞ്ചലസ് ഗാലക്‌സി, എ സി മിലാന്‍ എന്നീ ക്ലബുകള്‍ക്ക് വേണ്ടി ജഴ്‌സിയണിഞ്ഞ ബെക്കാം ഈ ടീമുകളിലെല്ലാം അതത് രാജ്യത്തെ ലീഗുകളിലെ കിരീടം നേടി. ഈ നേട്ടം കൈവരിച്ച ഏക ഇഅംഗ്ലീഷ് ഫുട്‌ബോളറാണ് ബെക്കാം.

1992ലാണ് ബെക്കാം മാന്‍യുവിന്റെ സീനിയര്‍ ടീമിലെത്തുന്നത്. 2003ല്‍ ടീം വിടുമ്പോള്‍ യുണൈറ്റഡിന് വേണ്ടി ബൂട്ടണിഞ്ഞത് 35694 കളികളില്‍. 85 ഗോളുകളും സ്വന്തം പേരില്‍ കുറിച്ചു. 2007 വരെ റയല്‍ മാഡ്രിഡില്‍. 157 മത്സരങ്ങളില്‍ നിന്ന് 19 ഗോളുകള്‍. ലോസാഞ്ചലസ് ഗാലക്‌സിയില്‍ 118 കളികളും 20 ഗോളുകളും. എ സി മിലാനില്‍ 33 കളികളില്‍ നിന്നായി രണ്ട് ഗോളുകള്‍. ഏറ്റവുമൊടുവില്‍ പി എസ് ജിയില്‍ ബൂട്ടഴിക്കല്‍. പി എസ് ജി ലീഗ് ചാമ്പ്യന്‍മാരാവുന്നതില്‍ പങ്കാളിയായാണ് ബെക്കാം പടിയിറങ്ങുന്നത്. യുണൈറ്റഡിന്റെ ആര് പ്രിമിയര്‍ ലീഗ് വിജയങ്ങളിലും ഒരു ചാമ്പ്യന്‍സ് ലീഗ് കിരീടധാരണത്തിലും പങ്കാളിയായി.

ഡെഡ്‌ബോള്‍ സ്‌പെഷ്യലിസ്റ്റായ ബെക്കാം അളന്നുമുറിച്ച ക്രോസുകള്‍ കൊണ്ടും ത്രൂപാസുകള്‍ കൊണ്ടും സ്‌ട്രൈക്കര്‍മാരുടെ ഹൃദയമായി പ്രവര്‍ത്തിച്ചു. മിക്കപ്പോഴും ബെക്കാമിന്റെ ക്രാസുകള്‍ തളികയിലെന്ന പോലെയാണ് ഗോള്‍മുഖത്തേക്ക് എത്തിയിരുന്നത്. ബെക്കാമിന്റെ വലങ്കാലില്‍നിന്ന് പറന്ന പന്തുകളെക്കാള്‍ വളരെ വലുതായിരുന്നു അദ്ദേഹത്തിന്റെ വിപണിമൂല്യം. ഏഷ്യയില്‍ ഇത്രത്തോളം ആരാധകരുളള മറ്റൊരു ഫുട്‌ബോളര്‍ ഉണ്ടായിട്ടില്ല. ഈ ജനപ്രീതി മാത്രമാണ് റയല്‍ മാഡ്രിഡിനെ ബെക്കാമിനെ ടീമിലെത്തിക്കാന്‍ പ്രേരിപ്പിച്ചത്. ബെക്കാമിന്റെ പ്രശസ്തി പണമായിത്തന്നെ റയല്‍ അധികൃതര്‍ തിരിച്ച് പിടിക്കുകയും ചെയ്തു.

ലോകമറിയുന്ന താരമായി തലയെടുപ്പോടെ നടക്കുമ്പോളും വിവാദങ്ങളില്‍ നിന്നെല്ലാം ബെക്കാം മുക്തനായിരുന്നു. സഹതാരങ്ങളില്‍ പലരും കുത്തഴിഞ്ഞ ജീവിതത്തിന് കുപ്രസിദ്ധരായപ്പോള്‍ ബെക്കാമിന്റെ സ്വകാര്യജീവിതം അസൂയാവഹമായിരുന്നു. സ്‌പൈസ് ഗേള്‍സ് ബാന്‍ഡിലെ അഗമായ വിക്ടോറിയ ആഡംസ് 1999ലാണ് ബെക്കാമിന്റെ ജീവിത പങ്കാളിയായത്. പിന്നീട് ഇരുവരും ലോകത്തിലെ ഏറ്റവും പ്രശസ്തരായ ദമ്പതികളായി. കുടുംബജീവിതത്തിലും ബെക്കാം സഹതാരങ്ങള്‍ക്ക് മാതൃകയായി.

ഇംഗ്ലണ്ടിന്റെ ഇതിഹാസ താരം ഗാരി ലിനേക്കറും ഇത് ശരിവയ്ക്കുന്നു. എല്ലാകാലത്തേക്കുമുളള റോള്‍ മോഡലാണ് ബെക്കാം. മികച്ച കളിക്കാരന്‍, ആഗോള സൂപ്പര്‍സ്റ്റാര്‍, ഇംഗ്ലീഷ് ഫുട്‌ബോളിനെ ചക്രവാളങ്ങള്‍ക്ക് അപ്പുറത്തേക്ക് എത്തിയ കളിക്കാരന്‍… ലിനേക്കറുടെ വാക്കുകള്‍ അവസാനിക്കുന്നില്ല. ലോകഫുട്‌ബോളില്‍ ഏറ്റവുമധികം സ്വാധീനമുളള വ്യക്തിയെന്നായിരുന്നു ഗാരി നെവിലിന്റെ പ്രതികരണം.

ലയണല്‍ മെസ്സിയും ക്രിസ്റ്റ്യാനോ റൊണാള്‍ഡോയുമെല്ലാം പ്രതിഫലമായി കോടികള്‍ വാരുമ്പോഴും ഫുട്‌ബോളില്‍ നിന്ന് ഏറ്റവും വരുമാനമുളള താരം ഇപ്പോഴും ബെക്കാം തന്നെയാണ്. ബെക്കാമിന്റെ ജനപ്രീതിയും സ്വീകാര്യതയുമാണ് ഈ കണക്കുകള്‍ വ്യക്തമാക്കുന്നത്. പരസ്യമാര്‍ക്കറ്റില്‍ ബെക്കാം കഴിഞ്ഞിട്ടേ മറ്റൊരു താരമുളളു. മറ്റ്താരങ്ങളുടെ കളിമിടുക്കില്ലാതെ വലങ്കാലിന്റെ കൃത്യത മാത്രം ഉപയോഗിച്ചാണ് ബെക്കാം ഈ നേട്ടങ്ങളെല്ലാം സ്വന്തമാക്കിയത്. അതുകൊണ്ടുതന്നെ ബെക്കാം എന്ന കളിക്കാരന് പകരക്കാരനില്ല. ബെക്കാമിന് തുല്യം ബെക്കാം മാത്രം.

April 18, 2013

ഹാട്രിക്കില്‍ ഹാട്രിക്കുമായി അമിത് മിശ്ര

അമിത് മിശ്ര
ബാറ്റ്‌സ്മാന്‍മാരുടെ കളിയാണ് ട്വന്റി 20. കുതിച്ചെത്തുന്ന പന്തിനെ അതിനെക്കാള്‍ വേഗത്തില്‍ ഗാലറിയിലേക്ക് പറത്തുകയാണ് ഓരോ ബാറ്റ്‌സ്മാന്റെയും ലക്ഷ്യം. അതുകൊണ്ടുതന്നെ ഐ പി എല്‍ മിക്കപ്പോഴും ബൗളര്‍മാരുടെ ശവപ്പറമ്പായി മാറുന്നു. ഇതിനിടയിലും മിന്നില്‍പ്പിണറുകള്‍ തീര്‍ക്കുന്നു ചില ബൗളര്‍മാര്‍. ഇക്കൂട്ടത്തില്‍ ഒന്നാമനാണ് അമിത് മിശ്ര.

ബാറ്റ്‌സ്മാന്‍മാര്‍ അരങ്ങുവാഴുന്ന ഐ പി എല്ലില്‍ അമിത് മിശ്ര സമാനതകളില്ലാത്ത റെക്കോര്‍ഡാണ് സ്വന്തമാക്കിയത്. പൂനെ വാരിയേഴ്‌സിനെതിര ഹാട്രിക് നേടിയാണ് മിശ്ര ഐ പി എല്ലില്‍ വീണ്ടും ഇടിമിന്നലായത്. ഐ പി എല്ലിന്റെയും ട്വന്റി 20 ക്രിക്കറ്റിന്റെയും ചരിത്രത്തില്‍ മൂന്ന് ഹാട്രിക് നേടുന്ന ആദ്യ ബൗളറാണ് മിശ്ര.

പൂനെ വാരിയേഴ്‌സിനെതിരെ ആയിരുന്നു സണ്‍റൈസേഴ്‌സ് ഹൈദരബാദിനെ വിജയത്തിലെത്തിച്ച മിശ്രയുടെ വിക്കറ്റ് കൊയ്ത്ത്. താരതമ്യേന ദുര്‍ബല സ്‌കോര്‍ പിന്തുടര്‍ന്ന പൂനെ അനായാസം ജയിക്കുമെന്ന ഘട്ടത്തിലായിരുന്നു ലഗ്‌സപിന്നറായ മിശ്ര ചുഴലിക്കൊടങ്കാറ്റായി വീശിയത്. ഹാട്രിക് അടക്കം ഒരോവറില്‍ നാല് വിക്കറ്റ്. അതോടെ അപ്രതീക്ഷിതമായി ജയം സണ്‍റൈസേഴ്‌സിന് സ്വന്തമാവുകയും ചെയ്തു.

പത്തൊമ്പതാം ഓവറിലെ രണ്ടാം പന്തില്‍ പുനെ നായകന്‍ ഏഞ്ചലോ മാത്യൂസിനെ പുറത്താക്കിയായിരുന്നു മിശ്രയുടെ തുടക്കം. അപ്പോള്‍ പൂനെയ്ക്ക് ജയിക്കാന്‍ വേണ്ടത് വെറും 14 റണ്‍സ്. നാലാം പന്തിലാണ് ഹാട്രിക്കിലേക്കുളള യാത്ര തുടങ്ങിയത്. മിശ്രയുടെ ഫഌപ്പറിന് മുന്നില്‍ വീണത് ഭുവനേശ്വര്‍ കുമാര്‍. അഞ്ചാം പന്ത് നേരിട്ട രാഹുല്‍ ശര്‍മയ്ക്കും മറുപടി ഉണ്ടായിരുന്നില്ല. അവസാന പന്തില്‍ അശോക ദിന്‍ഡയെ മിന്നുന്നൊരു ഗൂഗ്ലിയിലൂടെ പുറത്താക്കിയപ്പോള്‍ പൂനെയുടെ വിജയത്തിനൊപ്പം സമാനതകളില്ലാത്ത നേട്ടങ്ങളും മിശ്ര സ്വന്തമാക്കി.

ഐ പി എല്ലില്‍ മിശ്രയുടെ രണ്ടാമത്തെ മികച്ച ബൗളിംഗാണിത്. 19 റണ്‍സിന് നാല് വിക്കറ്റ്. 2008ല്‍ ഡല്‍ഹി ഡെയര്‍ ഡെവിള്‍സിന് വേണ്ടി ഡെക്കാന്‍ ചാര്‍ജേഴ്‌സിനെതിരെ 17 റണ്‍സിന് അഞ്ച് വിക്കറ്റ് നേടിതാണ് മശ്രയുടെ മികച്ച ബൗളിംഗ് പ്രകടനം. മൂന്ന് വിത്യസ്ത ടീമുകള്‍ക്ക് വേണ്ടിയായിരുന്നു മിശ്രയുടെ ഹാട്രിക് നേട്ടമെന്ന പ്രത്യേകതയുമുണ്ട്.

30കാരനായ മിശ്ര 13 ടെസ്റ്റുകളിലും 15ഏകദിനങ്ങളിലും ഇന്ത്യക്ക് വേണ്ടി പന്തെറിഞ്ഞിട്ടുണ്ട്.  ടെസ്റ്റില്‍ 43 വിക്കറ്റുകളും ഏകദിനത്തില്‍ 19 വിക്കറ്റുകളും സ്വന്തം പേരിനൊപ്പമുണ്ട്.

അമിത് മിശ്രയെക്കൂടാതെ ഏഴുപേര്‍കൂടി ആറാം പതിപ്പില്‍ എത്തിനില്‍ക്കുന്ന ഹാട്രിക് നേട്ടം സ്വന്തമാക്കിയിട്ടുണ്ട്. എട്ടു ബൗളര്‍മാരിലൂടെ 11 തവണ ഐ പി എല്‍ ഹാട്രിക് പ്രകടനത്തിന് സാക്ഷിയായി. പ്രവീണ്‍ കുമാര്‍സ രോഹിത് ശര്‍മയ യുവരാജ് സിംഗ്, മഖായ എന്റിനി, സുനില്‍ നരൈന്‍, അജിത് ചന്ദില, ലക്ഷ്മതി ബാലാജി എന്നിവരാണ് മറ്റ് ഹാട്രിക് നേട്ടക്കാര്‍. ആറാം പതിപ്പിലെ ആദ്യ ഹാട്രിക്കിന് ഉടമ വെസ്റ്റ് ഇന്‍ഡീസ് ബൗളറായ സുനില്‍ നരൈനാണ്.


ഐ പി എല്ലിലെ ഹാട്രിക്കുകള്‍ ഇതുവരെ

പ്രവീണ്‍ കുമാര്‍, രോഹിത് ശര്‍മ, യുവരാജ് സിംഗ്, അമിത് മിശ്ര, മഖായ എന്റിനി,
സുനില്‍ നരൈന്‍, അജിത് ചന്ദില, ലക്ഷ്മിപതി ബാലാജി



ചെന്നൈ സൂപ്പര്‍ കിംഗ്‌സ് താരമായിരുന്ന ലക്ഷ്മിപതീ ബാലാജിയാണ് ഐ പി എല്ലിലെ ആദ്യ ഹാട്രിക്കിനുടമ. 2008 മെയ് 10ന് കിംഗ്‌സ് ഇലവന്‍ പഞ്ചാബിനെതിരെ ആയിരുന്നു ബാലാജിയുടെ പടയോട്ടം. ഇരുപതാം ഓവറില്‍ കിംഗ്‌സിന് ജയിക്കാന്‍ വേണ്ടത് 27 റണ്‍സ്. ഇര്‍ഫാന്‍ പഠാന്‍, പിയൂഷ് ചൗള, വി ആര്‍ വി സിംഗ് എന്നിവരാണ് ബാലാജിക്ക് മുന്നില്‍ ഘോഷയാത്ര നടത്തിയത്.

ഐ പി എല്ലിലെ രണ്ടാമത്തെ ഹാട്രിക്കിന് ഉടമയും മിശ്ര തന്നെ. 2008 മേയ് 15ന് ഡെയര്‍ ഡെവിള്‍സിന് വേണ്ടി ഡെക്കാന്‍ ചാര്‍ജേഴ്‌സിനെതിരെ. ഷാഹിദ് അഫ്രീദി, ഹെര്‍ഷല്‍ ഗിബ്‌സ് എന്നീ വമ്പന്‍മാര്‍ക്കൊപ്പം രവി തേജയെ പുറത്താക്കി ഹാട്രിക് തികച്ചു.

മൂന്നാമത്തെ ഹാട്രിക്കിന് ഉടമ ദക്ഷിണാഫ്രിക്കന്‍ പേസര്‍ മഖായ എന്റിനിയാണ്. ചെന്നൈ സൂപ്പര്‍ കിംഗ്‌സിന് വേണ്ടി നൈറ്റ് റൈഡേഴ്‌സിനെതിരെ. ഈഡന്‍ ഗാര്‍ഡനില്‍ സൗരവ് ഗാംഗുലി, ദേബബ്രത ദാസ്, ഡേവിഡ് ഹസി എന്നിവരാണ് എന്റിനിയുടെ വേഗത്തിന് കീഴടങ്ങിയത്. അഞ്ചാം ഓവറിലെ അവസാന പന്തിലും പതിനേഴാം ഓവറിലെ ആദ്യ രണ്ട് പന്തുകളിലും വിക്കറ്റ് വീഴ്ത്തിയാണ് എന്റിനി ഹാട്രിക്കിനിടയിലെ അപൂര്‍വത സൃഷ്ടിച്ചത്.

നാലാമത്തെ ഹാട്രിക് കിംഗ്‌സ് ഇലവന്‍ താരമായിരുന്നു യുവരാജ് സിംഗിന്റെ പേരിനൊപ്പമാണ്. 2009ല്‍ റോയല്‍ ചലഞ്ചേഴ്‌സ് ബാംഗ്ലൂരിനെതിരെ. റോബിന്‍ ഉത്തപ്പ, ജാക് കാലിസ്, മാര്‍ക് ബൗച്ചര്‍ എന്നിവരായിരുന്നു ഇരകള്‍. രണ്ടോവറുകളിലായിട്ടാണ് യുവരാജും ഹാട്രിക് സ്വന്തമാക്കിയത്.

ബാറ്റ്‌സ്മാന്‍ ഹാട്രിക് തിളക്കം സ്വന്തമാക്കുന്നതായിരുന്നു അടുത്ത സംഭവം. 2009 മേയ് ആറിന് മുംബയ് ഇന്ത്യന്‍സിന്റെ മൂന്ന് വിക്കറ്റുകള്‍ വീഴ്ത്തിയത് രോഹിത് ശര്‍മ. ഡെക്കാന്‍ ചാര്‍ജേഴ്‌സിന് വേണ്ടിയായിരുന്നു രോഹിതിന്റെ അവിശ്വസനീയ ബൗളിംഗ്. അഭിഷേക് നായകര്‍, ഹര്‍ഭജന്‍ സിംഗ് , ജെ പി ഡുമിനി എന്നിവരാണ് രോഹിതിന്റെ ഹാട്രിക് നേട്ടത്തിന് മുന്നില്‍ വീണത്.

യുവരാജ് സിംഗ് വീണ്ടും ഹാട്രിക് പ്രകടനത്തോടെ ഗാലറികളെ ത്രസിപ്പിച്ചു, 2009 മേയ് 17ന് ഡെക്കാന്‍ ചാര്‍ജേഴ്‌സിനെതിരെ. ഹെര്‍ഷല്‍് ഗിബ്‌സ്, ആന്‍ഡ്രു സൈമണ്ട്‌സ്, വേണുഗോപാല്‍ റാവു എന്നിവരായിരുന്നു യുവരാജിന്റെ ഹാട്രിക് വഴിയില്‍ മടങ്ങിയത്.

പ്രവീണ്‍ കുമാര്‍ റോയല്‍ ചലഞ്ചേഴ്‌സിന് വേണ്ടി ഐ പി എല്ലിലെ ഏഴാമത്തെ ഹാട്രിക് സ്വന്തം പേരിനൊപ്പം കുറിച്ചു. 2010 നേയ് 18ന് രാജസ്ഥാന്‍ റോയല്‍സിനെതിരെ. പുറത്തായത് ഡാമിയന്‍ മാര്‍ട്ടിന്‍, മുമിത് നര്‍വാള്‍, പരസ് ദോഗ്ര. 2010 സീസണിലെ ഏക ഹാട്രിക്കും ഇതായിരുന്നു.

എട്ടാമത്തെ ഹാട്രിക് വീണ്ടും അമിത് മിശ്രയുടെ പേരിനൊപ്പം. കഴിഞ്ഞ സീസണില്‍ ഡെക്കാന്‍ ചാര്‍ജേഴ്‌സിന് വേണ്ടി പഞ്ചാബ് കിംഗ്‌സ് ഇലവനെതിരെ ആയിരുന്നു വിക്കറ്റ് വേട്ട. റയാന്‍ മക്ലാരന്‍, മന്‍ദീപ് സിംഗ്, റയാന്‍ ഹാരിസ് എന്നിവരായിരുന്നു  ഇരകള്‍.

രാജസ്ഥാന്‍ റോയല്‍സിന്റെ അജിത് ചന്ദിലയാണ് ഒന്‍പതാം ഹാട്രിക്കിന് അവകാശി. പുറത്തായത് പൂനെ വാരിയേഴ്‌സിന്റെ ജെസ്സി റൈഡര്‍, സൗരവ് ഗാംഗുലി, റോബിന്‍ ഉത്തപ്പ എന്നിവര്‍. ഹരിയാന താരമായ അജിത്തിന്റെ നാല് വിക്കറ്റ് പ്രകടും പൂനെയെ തോല്‍വിയിലേക്ക് തളളിയിട്ടു.

പത്താം ഹാട്രിക് ഈ സീസണില്‍ സുനില്‍ നരൈന്റെ പേരിനൊപ്പം ചേര്‍ക്കപ്പെട്ടു. കിംഗ്‌സ് ഇലവന്‍ പഞ്ചാബിന്റെ ഡേവിഡ് ഹസി, അസ്ഹര്‍ മഹ്മൂദ് . ഗുര്‍കീരത് സിംഗ് എന്നിവരെ പുറത്താക്കിയാണ് നരൈന്റെ ഹാട്രിക് നേട്ടം.
സുനില്‍ നരൈന്‍

ഒടുവില്‍ അമിത് മിശ്ര ഐ പി എല്ലിലെ പതിനൊന്നാം ഹാട്രിക്കിനും അവകാശിയായി, 2013 ഏപ്രില്‍ 17ന്. പൂനെയിലെ സുബ്രത സഹാറ സ്റ്റേഡിയത്തില്‍. കളിയിലെ കേമനായി തിരഞ്ഞെടുക്കപ്പെട്ടതും മറ്റാരുമായിരുന്നില്ല. ഐ പി എല്ലില്‍ മിശ്രയുടെ ആറാമത്തെ മാന്‍ ഒഫ് ദ മാച്ച് പുരസ്‌കാരംകൂടിയായിരുന്നു ഇത്. ബാറ്റിംഗിനിറങ്ങിയപ്പോള്‍ 30 റണ്‍സും മിശ്രയുടെ സംഭാവനയുണ്ടായിരുന്നു. ഇതും ഹൈദരാബാദ് വിജയത്തില്‍ നിര്‍ണായകമായി.

January 30, 2013

റെയ്‌ന: മധ്യനിയിലെ വിശ്വസ്തന്‍


ഇംഗ്ലണ്ടിനെതിരെ ടെസ്റ്റ് പരമ്പരയും പാകിസ്ഥാനെതിരെ ഏകദിന പരമ്പരയും തോറ്റതിന്റെ ക്ഷീണത്തിലാണ് ടീം ഇന്ത്യ ഇംഗ്ലണ്ടിനെതിരെ ഏകദിന പോരാട്ടങ്ങള്‍ക്കിറങ്ങിയത്. പരമ്പര കഴിഞ്ഞ ഇംഗ്ലണ്ട് നാട്ടിലേക്ക് മടങ്ങിയപ്പോള്‍ ഇന്ത്യക്ക് അല്‍പം ആശ്വസിക്കാം. രണ്ടിനെതിരെ മൂന്ന് മത്സരങ്ങള്‍ ജയിച്ച് ഏകദിന പരമ്പര നേടിയെന്ന്. പക്ഷേ, സ്വന്തം നാട്ടില്‍ ബൗളിംഗിലും ബാറ്റിംഗിലും ഇന്ത്യന്‍ താരങ്ങള്‍ വെളളംകുടിക്കുന്നതാണ് കളിക്കളത്തില്‍ കണ്ടത്. നായകന്‍ എം എസ് ധോണിയും സുരേഷ് റെയ്‌നയുമാണ് ഇതിന് അപവാദമായി ഇന്ത്യന്‍ നിരയില്‍ ഉണ്ടായിരുന്നത്. ഇതില്‍ തന്നെ റെയ്‌നയുടെ പ്രകടനമായിരുന്നു ഏറെ ശ്രദ്ധേയം.

2005ല്‍ ഇന്ത്യന്‍ ടീമിലെത്തിയ റെയ്‌ന ഇപ്പോഴും ടെസ്റ്റ് ടീമില്‍ സ്ഥാനം ഉറപ്പാക്കിയിട്ടില്ല. ടെസ്റ്റ് മത്സരങ്ങള്‍ക്കുളള സാങ്കേതിക മികവ് റെയ്‌നയ്ക്കുണ്ടോ എന്ന സംശയവും ബാക്കിനില്‍ക്കുന്നു. എങ്കിലും വര്‍ണക്കുപ്പായത്തില്‍ റെയ്‌ന ഇന്ത്യയുടെ വിശ്വസ്തനായിക്കഴിഞ്ഞു. അതിനുളള അംഗീകാരമാണ് ഇംഗ്ലണ്ടിനെതിരെ ലഭിച്ച മാന്‍ ഓഫ് ദ സീരീസ് പുരസ്‌കാരം. 159 മത്സരങ്ങളില്‍ പാഡണിഞ്ഞ റെയ്‌നയുടെ ആദ്യ മാന്‍ ഓഫ് ദ സീരീസ് പുരസ്‌കാരമാണിത്. ഇതിന് തൊട്ടുപിന്നാലെ റെയ്‌ന ഏകദിന റാങ്കിംഗില്‍ ആദ്യ പത്തില്‍ ആദ്യമായി ഇടംപിടിക്കുകയും ചെയ്തു.

ഇംഗ്ലണ്ടിനെതിരെ നാല് അര്‍ധസെഞ്ച്വറികളാണ് റെയ്‌ന നേടിയത്. ഇവയെല്ലാം ടീം ഇന്ത്യ പ്രതിരോധത്തിലായ ഘട്ടത്തിലായിരുന്നു. സമ്മര്‍ദത്തെ ആത്മവിശ്വാസം കൊണ്ട് മറികടക്കുകയായിരുന്നു റെയ്‌ന. ടോപ് ഓര്‍ഡര്‍ ബാറ്റ്‌സ്മാന്‍മാര്‍ എല്ലാവരും കീഴടങ്ങിയപ്പോഴാണ് റെയ്‌നയുടെ പോരാട്ടങ്ങളെല്ലാം.

രാജ്‌കോട്ട് എകദിനത്തില്‍ 49 പന്തില്‍ 50 റണ്‍സെടുത്ത റെയ്‌ന കൊച്ചിയില്‍ 78 പന്തില്‍ 55 റണ്‍സെടുത്തു. ധര്‍മശാലിയില്‍ ഇന്ത്യന്‍ ഇന്നിംഗ്‌സിന്റെ അടിത്തറയും റെയ്‌ന തന്നെയായിരുന്നു. 93 പന്തില്‍ 83 റണ്‍സ്. പരമ്പരയിലെ ഏറ്റവും മികച്ച ഇന്നിംഗ്‌സുകളില്‍ ഒന്നുകൂടിയായിരുന്നു ഇത്.
പരമ്പരയിലാകെ 277 റണ്‍സാണ് റെയ്‌ന നേടിയത്. ഇതില്ഡ 26 ബൗണ്ടറികള്‍ ഉള്‍പ്പെടുന്നു. അലസ്റ്റര്‍ കുക്കും (35), ഇയാന്‍ ബെല്ലും (27) പരമ്പരയില്‍ റെയ്‌നയേക്കാള്‍ ബൗണ്ടറി നേടിയ ബാറ്റ്‌സ്മാന്‍മാര്‍. 92.33 ആയിരുന്നു റെയ്‌നയുടെ സ്‌ട്രൈക്ക് റേറ്റ്.

ഇംഗ്ലണ്ടിനെതിരെയുളള പരമ്പരയോടെ ഇന്ത്യന്‍ മധ്യനിരയുടെ ശക്തിദുര്‍ഗമായി വളര്‍ന്നിരിക്കുകയാണ് റെയ്‌ന. 2005ല്‍ ശ്രീലങ്കയ്‌ക്കെതിരെ ആയിരുന്നു റെയ്‌നയുടെ അരങ്ങേറ്റം. ടെസ്റ്റില്‍ അവസരം ലഭിക്കാനായി അഞ്ചുവര്‍ഷം കൂടെ കാത്തിരിക്കേണ്ടി വന്നു. ക്രിക്കറ്റിന്റെ എല്ലാ ഫോര്‍മാറ്റുകളിലും സെഞ്ച്വറി നേടിയ ഏക ഇന്ത്യന്‍ ബാറ്റ്‌സ്മാന്‍കൂടിയാണ് 26കാരനായ റെയ്‌ന.

കശ്മീരി പണ്ഡിറ്റ് കുടുംബത്തില്‍ ജനിച്ച റെയ്‌ന അണ്ടര്‍ 19 ഇന്ത്യന്‍ ടീമിലൂടെയാണ് ശ്രദ്ധേയനാവുന്നത്. പതിനാറാം വയസ്സില്‍ ഉത്തര്‍പ്രദേശിന് വേണ്ടി രഞ്ജി ട്രോഫിയില്‍ അരങ്ങേറി. ബോര്‍ഡര്‍ ഗാവസ്‌കര്‍ സ്‌കോളര്‍ഷിപ്പോടെ ഓസ്‌ട്രേലിയയില്‍ പരിശീലനം നടത്തിയത് റെയ്‌നയിലെ ബാറ്റ്‌സ്മാനെ തേച്ചുമിനുക്കി. സൗരവ് ഗാംഗുലിയുടെ പകരക്കാരനായാണ് റെയ്‌ന ഇന്ത്യന്‍ ടീമിലെത്തിയത്. പിന്നാട് സെവാഗ്, യുവരാജ്, ഗംഭീര്‍ തുടങ്ങിയവരുടെയൊക്കെ പകരക്കാരനായി. ടീമില്‍ ആര്‍ക്കെങ്കിലും പരിക്കേറ്റാല്‍ റെയ്‌ന ഇന്ത്യന്‍ താരമാവും. തുടക്കത്തിലെ പാളിച്ചകള്‍ മറികടന്ന് കിട്ടിയ അവസരങ്ങള്‍ പ്രയോജനപ്പെടുത്തിയതോടെ റെയ്‌ന ടീമിലെ സ്ഥിരാംഗമാവുകയും ചെയ്തു. ഫീല്‍ഡിംഗ് മികവും റെയ്‌നയ്ക്ക് തുണയായി.

17 ടെസ്റ്റുകളില്‍ പാഡണിഞ്ഞ റെയ്‌ന 768 റണ്‍സെടുത്തു. ഒരു സെഞ്ച്വറിയും ഏഴ് അര്‍ധസെഞ്ച്വറിയും ഇതില്‍ ഉള്‍പ്പെടുന്നു. 120 റണ്‍സാണ് ഉയര്‍ന്ന സ്‌കോര്‍. 159 ഏകദിനങ്ങളില്‍ നിന്ന് നേടിയത് 4068 റണ്‍സ്. മൂന്ന് സെഞ്ച്വറികള്‍. 28 അര്‍ധസെഞ്ചറികള്‍. പുറത്താവാതെ നേടിയ 116 റണ്‍സ് ഉയര്‍ന്ന സ്‌കോര്‍. 36 ട്വന്റി 20യില്‍ നിന്ന് 840 റണ്‍സും നേടിയിട്ടുണ്ട്.

Key Words: Suresh Raina, Indian cricketer , Uttar Pradesh, Middle-order batsman, Off-spin bowler, Domestic cricket , Chennai Super Kings , Indian Premier League, Raina, ODI debut , Sri Lanka, World Cup winning

January 5, 2013

സമാനതകളില്ലാതെ ലയണല്‍ മെസ്സി


പ്രതിഭകള്‍ കാലഘട്ടത്തിന്റെ സൃഷ്ടിയാണ്. അവരുടെ കാലത്ത് ജീവിക്കാന്‍ കഴിയുക എന്നാണ് ആരാധകരുടെ ഭാഗ്യം. ഫുട്‌ബോളിനെ സ്‌നേഹിക്കുന്നവരുടെ ഏറ്റവും വലിയ ഭാഗ്യം ലയണല്‍ മെസ്സിയുടെ സുവര്‍ണ കാലത്ത് ജീവിക്കാനായി എന്നതായിരിക്കും. കാരണം തുല്യതയില്ലാത്ത കളിമികവുമായാണ് മെസ്സി കളിക്കളങ്ങളും ആരാധകരുടെ ഹൃദയങ്ങളും കീഴടക്കുന്നത്. കളിമികവി് അംഗീകാരമായി തുടര്‍ച്ചയായ നാലാം തവണയും മെസ്സി ലോക ഫുട്‌ബോളര്‍ പുരസ്‌കാരത്തിനുളള അന്തിമ പട്ടികയില്‍ ഇടംപിടിച്ചിരിക്കുന്നു. കഴിഞ്ഞ മൂന്ന് തവണയും മെസ്സിയായിരുന്നു ലോകഫുട്‌ബോളര്‍.

ക്രിസ്റ്റിയാനോ റൊണാള്‍ഡോ, ബാഴ്‌സലോണയിലെ സഹതാരം ആന്ദ്രേ ഇനിയസ്റ്റ എന്നിവരാണ് ഇത്തവണയും ലോക ഫുട്‌ബോളര്‍ പുരസ്‌കാത്തിനായി മെസ്സിക്കൊപ്പം മത്സരിക്കുന്നത്. 2012ല്‍ 91 ഗോളുകള്‍ അടിച്ചുകൂട്ടി ഇത്തവണയും പുരസ്‌കാരം മെസ്സി ഏറക്കുറെ ഉറപ്പാക്കിക്കഴിഞ്ഞു. നാലാം തവണയും പുരസ്‌കാരം നേടിയാല്‍ മെസ്സിക്കൊപ്പം ഫുട്‌ബോള്‍ ചരിത്രത്തില്‍ ആരുമില്ലാതാവും.

ബ്രസീലിന്റെ റൊണാള്‍ഡോ, സിനദിന്‍ സിദാന്‍, മിഷേല്‍ പ്ലാറ്റിനി, യോഹാന്‍ ക്രൈഫ്, മാര്‍കോ വാന്‍ ബാസ്റ്റന്‍ എന്നിവര്‍ മെസ്സിക്കൊപ്പം മൂന്ന് തവണ വീതം പുരസ്‌കാരം നേടിയിട്ടുണ്ട്. 1956ലണ് ബാലന്‍ ഡി ഓര്‍ പുരസ്‌കാരം ഏര്‍പ്പെടുത്തിയത്. നാലാം തവണയും പുരസ്‌കാരം നേടിയാല്‍ മെസ്സിയെ കാത്തിരിക്കുന്നത് അപൂര്‍വ ബഹുമതിയാണ്, സമാനതകളില്ലാത്ത ബഹുമതി.

ഇത്ര ചെറുപ്പത്തിലേ, പെലെയോടും മാറഡോണയോടും താരതമ്യം ചെയ്യപ്പെടുന്ന താരമാണ് മെസ്സി.   1991ലാണ് ഫിഫ പുരസ്‌കാരം ഏര്‍പ്പെടുത്തിയത്. 1956ല്‍ തുടങ്ങിയ ബാലന്‍ ഡി ഓര്‍ പുരസ്‌കാരം  2010ലാണ് ഫിഫ ഏറ്റെടുത്തത്.

മുന്‍വര്‍ഷത്തെ എതിരാളികള്‍ തന്നെയാണ് മെസ്സിക്ക് ഇത്തവണയും ഉളളത്. സ്‌പെയ്‌നിന്റെ കുതിപ്പിന് ചുക്കാന്‍ പിടിക്കുന്നതാണ് ഇനിയസ്റ്റയുടെ മികവ്. 2008ലെ ലോക ഫുട്‌ബോളറാണ് ക്രിസ്റ്റിയാനോ റൊണാള്‍ഡോ. പോര്‍ട്ടുഗല്‍ താരമായ റൊണാള്‍ഡോയുടെ സ്‌കോറിംഗ് മികവിലാണ് റയല്‍ മാഡ്രിഡ് സ്പാനിഷ് ലീഗില്‍ മികച്ച പ്രകടനം നടത്തിയത്.

ഒരു കലണ്ടര്‍ വര്‍ഷം ഏറ്റവുമധികം ഗോളുകള്‍ നേടിയ താരമെന്ന റെക്കോര്‍ഡ് മെസ്സി സ്വന്തമാക്കിയ സീസണ്‍ കൂടിയാണിത്. 1972ല്‍ ഗെര്‍ഡ് മുളളര്‍ നേടിയ 85 ഗോളുകളുടെ റെക്കോര്‍ഡാണ് മെസ്സി തകര്‍ത്തത്. മെസ്സി ഇത്തവണ ബാഴ്‌സലോണയ്ക്ക് വേണ്ടി 79 ഗോളുകളും അര്‍ജന്റീനയ്ക്ക് വേണ്ടി 12 ഗോളുകളും നേടിയിട്ടുണ്ട്. തന്റെ റേക്കോര്‍ഡ് മറികടക്കാന്‍ ഏറ്റവും യോഗ്യനായ താരം മെസ്സിയാണെന്ന് മുളളറും സാക്ഷ്യപ്പെടുത്തുന്നു.

Resistance Bands, Free Blogger Templates